نووسینگەی سوودانی: لیژنەیەک بۆ تاوتوێکردنی پرسی داهات و مووچەی کوردستان پێکدەهێنرێت

ئاڤا نیوز

نووسینگەی سەرۆکوەزیرانی عێراق ڕایگەیاند، لە چوارچێوەی پابەندبوون بە جێبەجێکردنی یاسای بودجەی گشتی و بڕیارەکانی دادگای فیدراڵی، لیژنەیەکی باڵا بە سەرۆکایەتیی وەزیری پلاندانان پێکهێنراوە بۆ تاوتوێکردنی پرسی داهات و مووچەی هەرێمی کوردستان.

 

چیرۆکی سەرەکی: ئەمڕۆ سێشممە کاتژمێر 1ـی پاشنیوەڕۆ کۆبوونەوەی هەفتانەی ئەنجوومەنی وەزیرانی عێراق بەسەرۆکایەتیی محەممەد شیاع سوودانی، سەرۆکوەزیرانی عێراق کۆبووەوە و 41 بڕگەی لەخۆگرت و گفتوگۆیان لەبارەیەوە کرا، هاوکات بڕیار درا لیژنەیەک دروست بکرێت بۆ تاوتوێکردنی پرسی داهات و مووچەی هەرێمی کوردستان.

 

ئەوەی پێویستە بیزانیت: ئەم بڕیارە دوای ئەوە دێت کە ئەنجوومەنی وەزیران گفتوگۆی لەسەر دوو پێشنیاز کرد؛ یەکێکیان لەلایەن حکومەتی فیدراڵی و ئەوی دیکەیان لەلایەن حکومەتی هەرێمی کوردستانەوە پێشکەش کرابوو. پێشنیازەکان تایبەت بوون بە ڕادەستکردنی داهاتە نەوتی و نانەوتییەکانی هەرێم و پرسی مووچەی فەرمانبەران و بەبانکیکردنی.

 

ئەو مانەیەی دەیگەیێنێت: بەپێی بڕیارەکە، لیژنەیەک دروست دەکرێت بەسەرۆکایەتیی جێگری سەرۆکوەزیران و وەزیری پلاندانان، و بە ئەندامێتیی وەزیرانی ئاوەدانکردنەوە و نیشتەجێکردن، خوێندنی باڵا، داد، و تەندروستی.

 

ئەوەی پێشبینی دەکرێت: ئەرکی لیژنەکە گفتوگۆکردنە لەسەر هەردوو پێشنیازەکە لەگەڵ سەرجەم لایەنە پەیوەندیدارەکانی حکومەتی فیدراڵی و حکومەتی هەرێم، و دواتر ڕاسپاردەکانی خۆی پێشکەش بە ئەنجوومەنی وەزیران دەکات، تاوەکو لەنزیکترین کاتدا بڕیاری پێویستی لەبارەوە بدرێت.