عێراق ڕێککەوتنی هاوردەی غاز لە تورکمانستانەوە ڕادەگەیێنێت

ئاڤا نیوز

وەزارەتی کارەبای عێراق ڕایگەیاند، لەگەڵ تورکمانستان گەیشتوونەتە ڕێککەوتن بۆ هاوردەکردنی غاز، بەگوێرەی ڕێککەوتنەکەش تورکمانستان غازەکە دەداتە ئێران، حکومەتی تارانیش لەسەر بنەمای "قەرەبوو" غازی خۆی بۆ وێستگەکانی کارەبای عێراق دەنێرێت.

وێنە گەورەکە: لە 1ی ئەم مانگەوە ئێران هەناردەی گازی شلی بۆ وێستگەکانی کارەبای عێراق بە ڕێژەی زیاتر لە 50% کەمکردووەتەوە، ئەوەش توانای عێراقی بۆ بەرهەمهێنانی کارەبا بە بڕی نزیکەی چوار هەزار مێگاوات کەم کردەوە، لەم کاتەشدا کە پێداویستی عێراق بۆ کارەبا گەیشتووەتە لووتکە ئەو بڕیارەی ئێران بە ئاستەنگییەکی گەورە بۆ بەغدا دادەنرێت.

لێدوانی فەرمی: ئەحمەد موسا، وتەبێژی وەزارەتی کارەبای عێراق بە ئاژانسی هەواڵی فەرمی ڕاگەیاند، بەگوێرەی ڕێککەوتنەکەیان لەگەڵ تورکمانستان، ئەو وڵاتە غاز بۆ باکووری ئێران دەنێرێت، لە بەرامبەریشدا ئێران بە هەمان بڕ غاز بۆ عێراق ڕەوانە دەکات.

پێدراوە ڕاستەکان: ڕێککەوتنەکە لەنێوان وەزیری کارەبای عێراق و وەزیری غازی تورکمانستان واژۆکراوە، بۆ چۆنییەتی پێدانی پارەی ئەو غازەش بە تورکمانستان، ئێستا وەزارەتی کارەبای عێراق چاوەڕێی ڕەزامەندی سەرۆکوەزیرانی عێراقە، دواتریش ڕێککەوتنەکە دەچێتەبواری جێبەجێکردنەوە.