حکومەتی کوردستان بۆ ناردنی مووچە 48 كاتژمێر مۆڵه‌ت به‌ به‌غدا ده‌دات

ئاڤا نیوز

هەرێمی کوردستان تەنیا 48 کاتژمێر مۆڵەتی بە بەغدا داوە بۆ ناردنی مووچە و مۆڵەتەکەش ئێوارەی ڕۆژی هەینی کۆتایی دێت، ئەگەر بەغدا وەڵامێکی ئەرێنی نەداتەوە، ئەوا دەست دەکات بە جێبەجێکردنی ئەو بژاردانەی کە لەبەردەمیدان، کشانەوەش لە پڕۆسەی سیاسی عێراق یەکێکە لە بژاردەکان.

چی ڕوودەدات: لە ئەگەری نەناردنی مووچە فراکسیۆنی پارتی و تیمی پارتی لە حکومەتی عێراق بڕیاریان داوە ئیتر بەشداری هیچ دانیشتنێکی پەرلەمانی عێراق و حکومەت نەکەن تاوەکو بەغدا بە ئەرێنی وەڵام دەداتەوە و شایستە داراییەکانی خەڵکی کوردستان دەنێرێت، ئەمە وەکو هەنگاوی یەکەمە.

زانیاریی تایبەت: حکومەتی هەرێمی کوردستان ئەمریکاشی ئاگادار کردووەتەوە و وتوویەتی، تەنیا ئەم 48 کاتژمێرە چاوەڕێ دەکەن، پێشیان وتوون ئەگەر بەغدا وەڵامی نەبوو چی دەکەن؟ واتە بژاردەکانیان داوە بە ئەمریکییەکان.

لەلایەکی دیکەوە: پارتی قسەی لەگەڵ یەکێتی نیشتمانی کوردستان کردووە، یەکێتی لەگەڵ پارتی هاوهەڵوێستە و  وتوویەتانە: "ئێمەش لەگەڵتانین، بکشێنەوە ئێمەش دەکشێینەوە". پارتی و یەکێتی کە پێکهێنەری سەرەکی حکومەتی کوردستانن، تەنیا ئەو دوو حیزبە لە حکومەتی عێراق بەشدارن و بەشێکن لە هاوپەیمانێتی ئیدارەی دەوڵەت.

باکگراوند: دوێنێ قوباد تاڵەبانی، جێگری سەرۆکوەزیرانی کوردستان ڕایگەیاند: "بەغدا بەم داواکارییانەی دەیەوێت شکۆی کوردستان کەم بکاتەوە، ئەو پێشنیازانەی کە کردوونی هەرێمی کوردستان لاواز دەبێت، ئەگەر قبووڵیان بکەین، واتە دەستوورمان پێشێل کردووە".

ئەمەش بزانە: ئەو لیژنە تایبەتەی دوێنێ لە کۆبوونەوەی ئەنجوومەنی وەزیرانی عێراق لەلایەن سوودانی پێکیهێنرا بۆ یەکلاکردنەوەی هەردوو ڕەشنووسی حکومەتی عێراق و حکومەتی هەرێمی کوردستان سەبارەت بە پرسەکانی نەوت و مووچە، ئەمڕۆ کۆبوونەوە، بڕیارە تاوەکو سبەی پێنجشەممە ڕەشنووسێکی نوێ ئامادە بکەن و بیدەن بە سوودانی، دواتر سوودانی کۆبوونەوەیەکی نائاسایی ئەنجوومەنی وەزیران ڕێکبخات و بڕیار لەبارەی ناردنی مووچە بدرێت.