شاندی دانوستانکاری هەرێمی کوردستان لە بەغدا بەرەو هەولێر گەڕانەوە

ئاڤا نیوز

شاندی دانوستانكاری هەرێمی كوردستان دوای چەند ڕۆژێك مانەوەیان لە بەغدا، ئەمشەو گەڕانەوە شاری هەولێر.

زانیاریی پەیامنێر: دەروون مەلا ناجی، پەیامنێری ئاڤا میدیا لە بەغدا ڕایگەیاند: كاتژمێر 9ـی ئەمشەو شاندی دانوستانکاری هەرێمی کوردستان کە چەند ڕۆژێكە لە بەغدا بوون گەڕانەوە شاری هەولێر.

زانیاریی زیاتر: دوێنێ وا بڵاو كرایەوە كە لیژنە وەزارییەكەی عێراق لەگەڵ هەردوو شاندی دانوسانتکاری هەولێر و بەغدا كۆدەبنەوە، بەڵام ئەمڕۆ هیچ كۆبوونەوەیەك لەنێوان لیژنە وەزارەییەكە و شاندەكەی هەرێمی كوردستان نەكرا، بەپێی زانیارییەكان هۆكاری كۆنەبوونەوەیان ئەوەیە لیژنەكە دوو نوێنەری كوردی تێدایە و سەرۆكی لیژنەكە هەر پرسیارێكی هەبێت و هەر زانیارییەكی پێویست بێت لەگەڵ ئەوان تاووتوێی دەكات.

ئەوەی پێویستە بیزانیت: شاندی دانوستانکاری هەرێمی کوردستان پێکهاتوون لە کەمال محەممەد، وەزیری سامانە سروشتییەکان، عەبدولحەکیم خەسرۆ، سەرۆکی فەرمانگەی هەماهەنگی و بەدواداچوون،  د.ئامانج ڕەحیم، سکرتێری ئەنجوومەنی وەزیران.

ئەمەش بزانە: ئەمڕۆ یەکەم کۆبوونەوەی لیژنەی وەزاری تایبەت بە یەکلایکردنەوەی هەردوو ڕەشنووسی حکومەتی فیدراڵی و حکومەتی هەرێمی کوردستان سەبارەت بەپرسی نەوت و مووچەی فەرمانبەرانی هەرێمی کوردستان لە بەغدای پایتەخت بەڕێوەچوو.