لە میسر تابلۆیەکی هونەریی دەدزرێت

ئاڤا نیوز

ژنە ڕاگەیاندکارێکی میسری تابلۆی ژنە شێوەکارێکی دانیمارکی دەدزێت و بە ناوی خۆی بلاوی دەکاتەوە، دواتر ئاشکرا دەبێت و داوای لێبوردن دەکات.

چیرۆکی سەرەکی: مەها سەغیر ژنە ڕاگەیاندکارێکی میسرییە و پێشتر ژنی ئەحمەد سەقا ئەکتەری بەناوبانگی میسری بوو و ماوەیەکە لە یەکتر جیابوونەتەوە، لە بەرنامەیەکی تەلەڤیزیۆنیدا لەپێش چاوی بینەران دەڵێت جگە لەوەی پێشکەشکار و ڕاگەیاندکارێکی بەناوبانگم من شێوەکارێکم ئەستەمە ڕکابەرم هەبێت، هەر لەو بەرنامەیە دەشڵێت تابلۆی وام کێشاوە مەگەر تابلۆی مۆنالیزای داڤێنشی بەو شێوەیە کێشرابێت. لەگەڵ قسەکانی تابلۆکە لە شاشە و باکگراوندی بەرنامەکە نمایشدەکرێت و لەسۆشیال میدیاش بڵاودەبێتەوە.

چی ڕوویدا: دوابەدوای نمایشکردنی تابلۆکە، دەرکەوت تابلۆکەی دزیوە و خاوەنی ڕەسەنی تابلۆکە دەرکەوت ئەویش ليزا لاش نێلسۆن، ژنە هونەرمەندێکی بەناوبانگی دانمارکییە، کاتێک تابلۆکەی خۆی دەبینێت کە چەندە پێوەی ماندوو بووە تووشی شۆک دەبێت.

کاریگەریی و لێکەوتەکان: کاردانەوەی دزینی تابلۆیەکی وا کاریگەر و بەناوبانگ گەیشتە ئاستی باڵیۆزخانەی هەردوو وڵات تا ئەو ڕادەیەی مەها سەغیر دەرکەوت و بە ئاشکرا گوتی من ئەو تابلۆیەم دزیوە و داوای لێبوردن لەو هونەرمەندە بەڕێزە دەکەم و جارێکی دیکە دووبارەی ناکەمەوە.

بۆچوونی لایەنی بەرامبەر: لەبەرامبەردا ليزا لاش نێلسۆن، لێبووردنەکەی قبووڵ کرد و لە تۆڕە کۆمەڵایەتییەکان و میدیا دانیمارکییەکان دەرکەوت و ڕایگەیاند، کە دزینی ڕەنجی هونەرمەندێک زۆر لەوە گەورەترە دڵ و جەستەی بریندار بکەیت، خەڵکەکەش لەتۆڕە کۆمەڵایەتییەکان ڕەخنەی تووندیان ئاراستەی مەها کرد، بەشێکیان لە کۆمینت نووسیویانە ڕەنگە جیابوونەوەی لە ئەحمەد سەقا کاریگەری دەروونی لەسەر دروست کردبێت بۆیە ئەو کارەی کردووە.