بەرپرسی ڕۆژنامەیەکی ئێران: ئیسرائیل بۆ سیخووڕی بەسەر ئێرانەوە سیحر و جادووی بەکارهێناوە

ئاڤا نیوز

 

عەبدوڵڵا گەنجی، بەرپرسی ڕۆژنامەی هەمشەهریی ئێران لە تۆڕی کۆمەڵایەتیی ئێکس بڵاوی کردووەتەوە، کە ئیسرائیل بۆ سیخووڕیکردن بەسەر ئێرانەوە، سیحر و جادووی بەکارهێناوە.

 

بڵاوکراوەی فەرمی: عەبدوڵڵا گەنجی نووسیویەتی، دیاردەیەکی سەیر، دوای شەڕی ئەم دواییەی نێوان ئێران و ئیسرائیل، چەند پەڕەیەکی کاغەز لەسەر شەقامەکانی تاران دۆزراونەتەوە، کە تەلیسم و هێمای جوویان لەسەر بووە.

 

زانیاریی زیاتر: گەنجی لە درێژەی بابەتەکەیدا نووسیویەتی، لە ساڵی یەکەمی شەڕی غەززەدا هەواڵی کۆبوونەوەی نەتانیاهۆ لەگەڵ شارەزایانی بواری جادووگەری دزەی پێکرا، هاوکات چەند ساڵێک لەمەوبەر عەلی خامنەیی، ڕێبەری باڵای کۆماری ئیسلامیی ئێران ڕایگەیاند، کە وڵاتانی نەیار و دەزگای هەواڵگریی ڕۆژئاوا و ئیسرائیل زانستە نامۆ و جادووییەکان و بوونەوەرە جنۆکەییەکان بۆ سیخووڕی بەکاردەهێنن.

 

باکگراوند: جەنگی نێوان ئێران و ئیسرائیل 12 ڕۆژ بەردەوام بوو، تاوەکو لە 24-6-2025 دۆناڵد ترەمپ، سەرۆکی ئەمریکا ڕایگەیاند، هەردوو وڵات بە ڕێککەوتنی ئاگربەست ڕازیی بوون، دوای ئەوەی لە ماوەی ئەم 12 ڕۆژەدا شەڕێکی سەخت لەنێوان ئەم دوو وڵاتەدا ڕووی دا و زیانێکی زۆری ماددی بەر هەردوو وڵات کەوت و سەدان کەسیش بوونە قوربانی.