بانکە پسپۆڕییەکان داتای سوودمەندبووانی قەرزی پێشینەکان کۆ دەکاتەوە

ئاڤا نیوز

 

بەڕێوەبەرایەتیی گشتیی بانکە پسپۆرییەکان نووسراوێکی بۆ سەرجەم بانکەکان کردووە و داوای داتای ورد و درشتی سەبارەت بە قەرزی پێشینەی هاووڵاتیان کردووە، بۆ ئەوەی ببردرێتە ئەنجوومەنی وەزیران و گفتوگۆ لەسەر لێخۆشبوونیان بکرێت.

 

وێنە گەورەکە: لەماوە ساڵانی ڕابردوو هەزاران هاووڵاتی لە پێشینەی قەرزەکانی (خانووبەرە، كشتوكاڵی، نیشتەجێبوون، پیشەسازی، گەشتوگوزار و هاوسەرگیری) سوودمەند بوون، دانەوەی بەشێوەی قیست لە خودی فەرمانبەرەکە، یان لە مووچەی کەفیلی فەرمانبەرەکە وەردەگیرایەوە.

 

لێدوانی فەرمی: سەرچاوەیەک لە وەزارەتی دارایی و ئابووری بە ئاڤای گوت، "دوای وردبینی تەواوی داتاکان لەسەر ئەوەی جۆری سوودمەندبوون، چەند سوودمەند هەیە، بڕی چەندی قەرزەکانیان داوەتەوە و چەندیان لەلا ماوە، دواتر  لە بانکە پسپۆرییەکان دەگەڕێتەوە وەزارەتی دارایی و لەوێش بە نووسراوێک دەبردرێتە ئەنجوومەنی وەزیران و بڕیاری لەبارەوە دەدرێت."

 

باکگراوند: 24ـی04ـی2024، لە کۆبووەنەوەی ئەنجوومەنی وەزیران وەک پێشنیازێک سەبارەت بە ئاسانکاریکردن بۆ گەڕاندنەوەی پێشینەکانی بانکە پسپۆڕییەکان خرایە بەرباس، وەزارەتی دارایی ڕاسپێردرا داتاکان کۆ بکاتەوە و لە کۆبوونەوە بیخاتەڕوو.