مەیخانەیەک لە ڕانیە بۆ هەمیشە دادەخرێت

ئاڤا نیوز

بەهۆی ئەوەی كەوتووەتە بەرامبەر قوتابخانەی بنەڕەتی و ئامادەیی كچان و هەردوو تەنیشتی باخچەی ساوایان و مزگەوت بوو، فرۆشگەیەكی خواردنەوە كحولییەكان بۆ هەمیشەیی داخرا.

چیرۆكی سەرەكی: لیژنە هاوبەشەكانی قایمقامیەتی قەزای ڕانیە بە هەماهەنگی لەگەڵ فەرمانگە پەیوەندیدارەكان، لە بەردەوامی بەدواداچوون و پشكنین بۆ بازاڕەكان و شوێنە گشتییەكان، لەپێناو بەرژەوەندی گشتی، بڕیارێكی هاوبەشیان دا و فرۆشگەیەكی خواردنەوە كحولییەكانیان بۆ هەمیشەیی داخست.

ڕاگەیێنراوی فەرمی: قایمقامیەتی قەزای ڕانیە ڕایدەگەیەنێت، هۆكاری داخستنی ئەم فرۆشگەیە، بەهۆی پابەندنەبوونی بووە بە ڕێنماییەكانی بەڕێوەبەرایەتیی گشتیی گەشتوگوزاری ئیدارەی ڕاپەڕین، جگە لەوەش هەڵكەوتەی شوێنی جوگرافی نەگونجاو بوو و بەهیچ جۆرێكیش لەگەڵ داب و نەریتی گشتی نەدەگونجا، بۆیە لەسەر سكاڵای هاووڵاتیان، بڕیاری داخستنی ئەو شوێنە دراوە.

قایمقامیەتی قەزای ڕانیە داوا لە هاووڵاتیان دەكات بۆ گەیاندنی سكاڵا و زانیاریی پێویست، لەكاتی تێبینیكردنی هەرجۆرە سەرپێچی و كەموكوڕییەک، لیژنەكانی قایمقامیەت و ئاسایش و پۆلیسی ڕاپەڕینی لێ ئاگادار بكەنەوە.