جێگری بەڕێوەبەری سۆمۆ بۆ ئاڤا: شاندی عێراقی كە دەگەڕێنەوە بەغدا لە بۆچوونەكانیان پەشیمان دەبنەوە

ئاڤا نیوز

جێگری بەڕێوەبەری گشتی کۆمپانیای سۆمۆ تایبەت بۆ ئاڤا ئاشكرای دەكات، سەرەڕای ئەوەی كۆبوونەوەكانی نێوان شاندی حكومەتی هەرێمی كوردستان و حكومەتی فیدراڵ كە لە هەولێر دەكرێن، ئەرێنییە، بەڵام كە شاندی عێراقی دەگەڕێنەوە بەغدا، لەو سەرنج و بۆچوونانەی كە لەنێو كۆبوونەوە دەریدەبڕن، پەشیمان دەبنەوە. دووپاتیشی دەكاتەوە، هەناردەكردنەوەی نەوت هیچ پەیوەندییەكی بە لایەنی تەكنیكی و هونەرییەوە نییە، پرسەكە تەواو سیاسییە.

وێنە گەورەكە: پرسی دەستپێكردنەوەی هەناردەكردنی نەوتی هەرێمی كوردستان لەڕێگەی بۆری بەرەو بەندەری جەیهان لە توركیا كە زیاتر لە 28 مانگە وەستێنراوە، بووەتە گرێ كوێرەی نەگەیشتن بە ڕێككەوتن لەنێوان هەولێر و بەغدا بە تایبەت لە كێشەی ڕاگرتنی مووچەی هەرێمی كوردستان، هەر ئەمەش وایكردووە كۆبوونەوەكان و دانووستانەكان بێ ئەنجام بن.

لێدوانی فەرمی: د. حەمدی شنگالی، جێگری بەڕێوەبەری گشتیی کۆمپانیای سۆمۆ، لە لێدوانێکی تایبەتدا بە ئاڤا میدیا ڕاگەیاند: لە دواهەمین کۆبوونەوەی شاندی هەرێم و بەغدا کە لە هەولێر بەڕێوەچوو، سەرۆکوەزیران مەسروربارزانی لە کۆبوونەوەکەدا بەشداربوو و  کۆبوونەوەکە زۆر ئەرێنی بوو، بەڵام کە شاندی عێراقی گەڕانەوە بەغدا، نازاندرێت هۆکارەکە چییە و ڕا و بۆچوونەكانیان پێچەوانە دەبنەوە.

شنگالی دووپاتیشی دەكاتەوە، بابەتەکان هیچ پەیوەندییان بە گرفتی تەکنیکی و هونەرییەوە نییە، چونکە گەر بابەتەکە ئەوە بێت، ئەوا دەتواندرێت لەماوەی دوو ڕۆژدا سەرجەم بابەتەکان چارەسەر بكرێن.