لە کاتی هێرش بۆ سەر بنکەی عەین ئەسەد حەسەن ڕۆحانی خەوتووە

ئاڤا نیوز

حەسەن ڕۆحانی، سەرۆککۆماری پێشووی ئێران جەخت دەکاتەوە لەسەر دروستی قسەکانی وەزیری پێشووی دەرەوەی ئێران کە گوتبووی ئەنجوومەنی باڵای ئاسایشی نەتەوەیی و دەستەی ئەرکانی هێزە چەکدارەکان ئەو شەوەی بنکەی عەین ئەسەدیان لە عێراق لە تۆڵەی کوژرانی قاسم سوولەیمانی بۆردوومان کرد ئەمانیان ئاگادار نەکردووەتەوە.

 

چیرۆکی سەرەکی: چوار ساڵ پێش ئێستا، لە ڕۆژی 08- 01- 2020، دوای پێنج ڕۆژ لە کوژرانی قاسم سوولەیمانی سوپای پاسداران بنکەی سەربازی ئەمریکییەکانی لە ئەنبار بە مووشەکی بالیستیکی کردە ئامانج.

 

لێدوانی فەرمی: محەممەد جەواد زەریف، وەزیری پێشووی دەرەوەی ئێران لە یاداشتەکانیدا دەڵێت: دوای چەند کاتژمێرێک لە هێرشەکە، هەواڵەکەی لە عەباس عێراقچی جێگرییەوە بیستووە، تەنانەت حەسەن ڕۆحانی سەرۆککۆماریش ئاگای لێنەبووە، لەکاتێکدا فەرماندە سەربازییەکانی ئێران چەند کاتژمێرێک پێش هێرشەکە عادل عەبدولمەهدی، سەرۆکوەزیرانی ئەوکاتی عێراقیان ئاگادار کردبوویەوە، ئەویش بە ئەمریکییەکانی گوتبوو.

زانیاری بەدەستهاتوو: ڕۆژنامەی کەیهانی نزیک لە نووسینگەی ڕێبەری باڵای ئێران بڵاوی کردەوە، ڕۆحانی نووستبوو، بۆیە فەرماندە سەربازییەکان نەیانتوانیوە هەواڵی هێرشکردنە سەر بنکەی سەربازیی عەین ئەسەدی پێبدەن.