کتێبخانەی گشتیی هەولێر بۆماوەی سێ مانگ دادەخرێت

ئاڤا نیوز

گەورەترین کتێبخانەی پارێزگای هەولێر لەلایەن ڕێکخراوی کۆیکای کۆریای باشوور نۆژەندەکرێتەوە، بەڕێوەبەری کتێبخانەکە دەڵێت، پرۆسەی نۆژەنکردنەوەکە سێ مانگ دەخایەنێت.

وێنە گەورەکە: کتێبخانەی گشتیی هەولێر جگە لەوەی گەورەترین کتێبخانەیە لەسەر ئاستی پارێزگای هەولێر، سەرپەرشتی حەوت کتێبخانەی دیکەی دەورووبەری هەولێر دەکات، دەکەوێتە ناو پارکی سامی عەبدولرەحمان.

لێدوانی فەرمی: ناز فەلەکەدین کاکەیی، بەڕێوەبەری کتێبخانەی گشتیی هەولێر و دەورووبەر بە ئاڤا میدیای ڕاگەیاند، کتێبخانەکە کێشەی زۆری هەبوو، سەقفەکەی کۆن بوو زستانان ئاوی دەدا، کۆمپیوتەرەکانی کۆن بوون. دوای هەوڵێکی زۆر ڕەزامەندی ڕێکخراوی کۆیکای کۆریای باشوور وەرگیرا، بە پاڵپشتی ڕێکخراوەکە،کۆمپانیایەکی ناوخۆیی کتێبخانەکە نۆژەن دەکاتەوە. لە 1-7-2025 نۆژەنکردنەوەکە دەستیپێکردووە بڕیارە سێ مانگ بەردەوام بێت. بەهۆی ئەوەی کتێبەکان لادەدرێن، بۆیە ئەو ماوەیە ناتوانین پێشوازی لە سەردانیکاران بکەین. تەنیا بەشە کارگێڕییەکە دەوامی دەبێت.

بەوتەی بەڕێوەبەری کتێبخانەی گشتی هەولێر، سیستمی کارەبای کتێبخانەکە دەکرێتە وزەی خۆر، ئەسانسۆری بۆ دادەنرێت، هاوکات سیستمی نوێی ساردەکەرەوەشی بۆ دادەنرێت، شەقامێکی بۆ دروست دەکرێت تا بەردەم کتێبخانەکە، چونکە کتێبخانەکە دەکەوێتە ناو چەقی پارکی سامی عەبدولرەحمان.

زانیاریی زیاتر: تا ئێستا کتێبخانەی گشتیی هەولێر دووجاری دیکە نۆژەنکراوەتەوە، جارێک لە ساڵی 2017 ڕێکخراوی کۆیکا نۆژەنیکردوەتەوە، ساڵی 2022 جارێکی دیکە بەشێک لە کتێبخانەکە نۆژەنکرایەوە و سپلیتەکانی گۆڕدران.

باکگراوند: کتێبخانەی گشتیی هەولێر، ساڵی 2005 لەسەر ڕووبەری چوار هەزار مەتر دووجا دەستکرا بە دروستکردنی ساڵی 2008 کۆتایی هات و کرایەوە. جگە لە بەشی منداڵان کە هەزار و 600 کتێبی زمانی جۆراوجۆری تێدایە. کتێبخانە زیاتر لە 350 هەزار کتێبی تێدایە، ئەمە جگە لەوەی کێبخانەیەک بە زمانی کۆری هەیە. چەندین کتێبی کۆن و تابلۆی کۆنی هونەرمەندانی شاری هەولێری تێدایە. ساڵی ڕابردوو شەش هەزار کەس سەردانی کتێبخانەکەی کردووە.