لە ڕۆژهەڵاتی کوردستان پیاوێکی 78 ساڵ زیاتر لە 50 ساڵە سەرچۆپی بەرنەداوە

ئاڤا نیوز

لە ڕۆژهەڵاتی کوردستان پیاوێکی تەمەن 78 ساڵ زیاتر لە 50 ساڵە لە شایی و هەڵپەڕکێکان سەرچۆپی بەرنەداوە و بە پاشای هەڵپەڕکێکان ناوبانگی دەرکردووە.

چیرۆکی سەرەکی: پیاوێکی بە تەمەنی مەریوان لە ڕۆژهەڵاتی کوردستان کە بە پاشای هەڵپەڕکێ ناسراوە و ناوی جەلالە و قسە خۆشە و بەهۆی ڤیدیۆکانی لە تۆڕەکۆمەڵایەتییەکان ناوبانگی دەرکردووە. جەلال لە هەموو ئاهەنگ و بۆنەیەکی گەورەدا بەشداری لە هەڵپەڕكیان دەکات و کەم کەسیش وەک ئەو شارەزا و لێزانە، دەڵێن هەر هەڵپەڕكێیەک ئەوی تێدا بێت، تام و چێژ بە ئاهەنگەکە دەبەخشێت.

لێدوانی فەرمی: جەلال قسە بۆ ئاڤا دەکات و دەڵێت، "تەمەنم 78 ساڵە و زیاتر لە 50 ساڵە سەرچۆپیم بەرنەداوە". دەشڵێت، هەڵپەڕکێ چەندین جۆری هەیە کە دیارترینیان، هەڵپەڕکێکانی قنجە و حەریرە و قڕەپیرەژنن.

جەلال دەڵێت، "ئێمە سێ هاوڕێین کە لە شایی و هەڵپەڕکێکان هەر دەبێت لەتەنیشت یەکەوە بین، بۆئەوەی شاییەکە جوانتر و گەرمتر بێت و خۆشم سەرچۆپییەکە دەگرم، بەڵام کاتێک کەسێک دێتە نێوانمان، من قاچێکم بەرز دەکەمەوە، ئەمەش نهێنییەکە لەنێوانمان و تەنیا ئەو سێ کەسەمان لێی تێدەگەین، واتە ئەو کەسەی کە هاتووەتەوە نێوانمانەوە، لێی نازانێت و دەستی لێ هەڵگرن".

جەلال باسی ئەوەش دەکات، جاری وا هەبووە، "بەیەک شەو چووم بۆ چوار زەماوەند و گەرمم کردووە. هەتا لەژیانیشدا مابم هەر هەڵدەپەڕم.

ئەوەی پێویستە بیزانیت: هەڵپەڕکێی مەریوانی ناو و ناوبانگی زۆری هەیە و سەرنجڕاکێشە.