شوان كەلاری: كۆبوونەوەی فراكسیۆنە كوردستانییەكان و وەزیرە كوردەكان ئەرێنی بوو

ئاڤا نیوز

پەیوەست بە پرسی ناردنی مووچەی فەرمانبەرانی هەرێمی كوردستان، كۆبوونەوەی فراوانی فراكسیۆنە كوردستانییەكانی نێو پەرلەمانی عێراق و وەزیرە كوردەكانی حكومەتی فیدراڵ، لەگەڵ جێگری سەرۆكی پەرلەمانی عێراق بەڕێوەچوو، بەپێی زانیارییەكان كۆبوونەوەكە "ئەرێنی بوو".

چیرۆكی سەرەكی: شەوی ڕابردوو، کۆبوونەوەی سەرجەم فراکسیۆنە كوردستانییەکانی پەرلەمانی عێراق جگە لە فراكسیۆنی نەوەی نوێ لەگەڵ تیمی وزاری كە پێكهاتبوون لە وەزیرە كوردەكانی حكومەتی فیدراڵ، بەڕێوەچوو. ئامانج لە كۆبوونەوەكە پرسی مووچەی هەرێمی كوردستان بوو.

زانیاریی تایبەت: پێشتر د. ڤیان سەبری، سەرۆكی فراكسیۆنی پارتی دیموكراتی كوردستان لە پەرلەمانی عێراق ڕایگەیاند، لە كۆبوونەوەكە، وەزیرە كوردەكانی حكومەتی فیدراڵ و فراكسیۆنەكانی پارتی، یەكێتی، یەكگرتوو و كۆمەڵی دادگەری، لەگەڵ د. شاخەوان عەبدوڵڵا، جێگری سەرۆكی پەرلەمانی عێراق بەشدار دەبن.

لێدوانی فەرمی: شوان کەلاری، ئەندانی ئەنجوومەنی نوێنەرانی عێراق لەبری سەرۆکی فراکسیۆنی پارتی بەشداری کۆبوونەوەکەی کرد، بە ئاڤای وت، "کۆبوونەوەکە ئەرێنی بوو، ھەمووان یەکدەنگ بووین کە ھەوڵەکانی ئەم چەند ڕۆژە لە پێناو چارەسەرکردنی مووچەی فەرمانبەران دەبێت.

كەلاری ڕوونیشی كردەوە، پرسی مووچەی هەرێمی كوردستان، نەخراوەتە بەرنامەی كاری ئەمڕۆی پەرلەمانی عێراق.

باكگراوند: 74 ڕۆژە، بەغدا مووچەی فەرمانبەرانی کوردستانی ڕاگرتووە، سەرەڕای هەوڵەکانیش لە ئەنجوومەنی وەزیرانی عێراق، دادگای فیدراڵی و پەرلەمانی عێراق، تائێستا بڕیاری ناردنی مووچە نەدراوە، دوێنێش بارەگای بارزانی بڵاویکردەوە، لە بەغداوە بەڵێنی چارەسەرکردنی پرسی ناردنی مووچە و شایستە داراییەکانی هەرێمی کوردستان لە چەند ڕۆژی داهاتوو دراوە.