کۆبوونەوەی ئەنجوومەنی وەزیرانی عێراق کۆتاییهات و باسی مووچە نەکرا

ئاڤا نیوز

 

ئەمڕۆ کۆبوونەوەی ئەنجوومەنی وەزیرانی عێراق بەسەرپەرشتی محەممەد شیاع سوودانی بەڕێوەچوو و باسی مووچەی فەرمانبەرانی کوردستان نەکرا.

 

بۆچی گرنگە: نزیکەی 75 ڕۆژە حکومەتی عێراق مووچەی مووچەخۆرانی هەرێمی کوردستانی خەرج نەکردووە، سەرباری ئەوەی هەرێمی کوردستان چەندین هەنگاوی کرداری بە ئاراستەی چارەسەرکردنی کێشەی مووچە و نەوت ناوە، بەڵام حکومەتی عێراق هەرجارە و بەبیانویەک ئامادە نییە ڕێککەوتن بکات و مووچەی خەڵکی کوردستان ڕەوانە بکات. 

 

چی ڕوودەدات: ئەمڕۆ سێشەممە، ڕێککەوتی 15ـی 7ـی 2025، کۆبوونەوەی ئەنجوومەنی وەزیرانی عێراق بە سەرپەرشتیی محەممەد شیاع سوودانی بەڕێوەچوو. چاوەکان لەسەر ئەوەبوو پرسی مووچەی مووچەخۆرانی هەرێمی کوردستان بخرێتە سەر مێزی کۆبوونەوەکە و گفتوگۆی لەبارەیەوە بکرێت.

 

زانیاریی پەیامنێر: دەروون مەلا ناجی، پەیامنێری ئاڤا لە بەغدا ڕایگەیاند، ماوەی کۆبوونەوەکە لە چاو کۆبوونەوەکانی پێشووتر کەم بووە و تەنها نزیکەی کاتژمێرێک و نیوێکی خایاندووە.

 

هاوکات: پەیامنێری ئاڤا پشتڕاستی کردەوە، کە وەزیرەکانی پارتی دیموکراتی کوردستان بەشداریان لە کۆبوونەوەکەی ئەمڕۆی ئەنجوومەنی وەزیرانی عێراق کردووە.