بۆ بەردانەوەی ئاوی زیاتر بۆ عێراق داوای فشاری زیاتر لەسەر تورکیا دەکرێت

ئاڤا نیوز

پەرلەمانتارێكی عێراق تورکیا تۆمەتبار دەکات بە جێبەجێنەکردنی ڕێککەوتنەکانی لەگەڵ عێراق سەبارەت بە بەردانەوەی ئاوی ڕووبارەکان. هاوکات داوا لە حکومەتی عێراق دەکات فشاری زیاتر لە تورکیا بکات کە ئاوی پێویست بەربداتەوە.

وێنە گەورەکە: بەپێی ڕێککەوتنی نێوان تورکیا و عێراق، پێویستە تورکیا لە هەر چرکەیەکدا 500 مەتر سێجا ئاو بۆ عێراق بەربدات، بەڵام بەپێی وتەی پەرلەمانتارانی عێراق، تورکیا پابەندی ڕێککەوتنەکە نەبووە.

لێدوانی فەرمی: ئیبتیسام هیلالی، ئەندامی لیژنەی کشتوکاڵ و ئاو و زۆنگاوەکانی پەرلەمانی عێراق ڕایگەیاند: باشووری عێراق بەدەست کەمیی ئاوەوە دەناڵێنێت، تورکیا بەڵێنەکانی لەگەڵ عێراق جێبەجێ نەکردووە کە پێویستە 500 مەتر سێجا ئاو لە چرکەیەکدا بەربدات، لەکاتێکدا ئێستا تەنیا 225 بۆ 250 مەتر سێجا بەردەدات.

ناوبراو جەختیشی کردەوە کە دەبێت فشار لە تورکیا بکرێت ئەگەر ئەو وڵاتە ئاوی پێویست بۆ عێراق بەرنەدات. هەروەها قەبارەی ئاڵوگۆڕی بازرگانی و کۆمپانیاکانی کارکەر لە عێراق وەکو کارتی فشار دژی تورکیا بەکاربهێنرێت.

لەلایەکی دیکەوە: دوێنێ سێشەممە، ئەنیل بۆرا ئانان، باڵیۆزی تورکیا لە عێراق ڕایگەیاند، تورکیا بڕیاریداوە ئاوی زیاتر بۆ عێراق بەربداتەوە.