ئەنجوومەنی ئاسایش دەنگ لەسەر ئاگربەستی غەززە دەدات

 

ئاڤا نیوز

 

ئەمڕۆ دووشەممە ئەنجوومەنی ئاسایشی نەتەوەیەکگرتووەکان دەنگ لە سەر پڕۆژەبڕیارێکی دیکەی تایبەت بە ئاگربەستی غەززە دەدات.

 

وێنە گەورەکە: دوای ئەوەی ڕووسیا و چین پڕۆژەبڕیارێکی ئەمریکایان سەبارەت بە ئاگربەستی غەززە ڤیتۆ کرد، وڵاتانی ئەندامی ناهەمیشەیی ئەنجوومەنی ئاسایش بە پاڵپشتیی ڕووسیا و چین پڕۆژەیەکی نوێ دەخەنە دەنگدانەوە.

 

زانیاریی زیاتر: بەگوێرەی پڕۆژەبڕیارەکە ئاگربەستی دەستبەجێ لە غەززە بۆ ماوەی مانگی ڕەمەزان ڕادەگەیێنرێت، بەمەبەستی ئەوەی ببێتە سەرەتایەک بۆ ئاگربەستێکی هەمیشەیی.

 

بابەتی ستراتیژی: پڕۆژەکە داوای دەستبەجێ  ئازادکردنی سەرجەم بارمتەکان و گەیاندنی هاوکاری مرۆیی بۆ کەرتی ‌غەززە دەکات.

 

باکگراوند: لە مانگی 10ی ساڵی ڕابردووەوە کە شەڕی ئیسرائیل و حەماس هەڵگیرساوە، هەشت پڕۆژە بڕیاری تایبەت بە غەززە خراونەتە دەنگدانەوە و تەنها دووانیان پەسەندکراون، ئەوانیش پەیوەستبوون بە یارمەتییە مرۆییەکان نەک ئاگربەست.