دەستڕێژی گوللە لە بەڕێوەبەری ناحیەی دارەتوو کرا و بریندارە

ئاڤا نیوز

 

بەیانیی ئەمڕۆ لەنێو بازاڕی بەردەڕەش چەند کەسێک تەقە لە تەحسین عسمەت، بەڕێوەبەری ناحییەی دارەتووی سنووری بەردەڕەش دەکەن و هەڵدێن.

 

چیرۆکی سەرەکی: بەهۆی کێشەیەکی کۆنی کۆمەڵایەتییەوە، بەیانیی ئەمڕۆ پێنجشەممە، لە نزیک سەموونخانەیەک تەقە لە بەڕێوەبەری ناحییەی دارەتوو کرا و سێ فیشەکی بەرکەوت، دوانی بەر قاچ و دانەیەکیش بەر دەستی کەوتووە.

 

لێدوانی فەرمی: بڕوا فارووق، قایمقامی قەزای بەردەڕەش بە ئاڤای گوت، "کێشەکە بۆ سەردەمی پێش دەستبەکاربوونی وەک بەڕێوەبەری ناحییە دەگەڕێتەوە، ئێستا لە نەخۆشخانەی ئاکرێیە و تەندروستی جێگیرە."

 

زانیاریی پەیامنێر: سەلام موشیر، پەیامنێری ئاڤا لە ئاکرێ ڕایگەیاند، لە ڕووداوەکەدا کرێکارێکی سەموونخانەکە برینداربووە.

 

زانیاریی زیاتر: بەگوتەی قایمقامی بەردەڕەش، بکەرانی ئەم ڕووداوە هەڵاتوون و پۆلیس لە لێکۆڵینەوە بەردەوامە، بۆ ئەوەی دەستگیریان بکات.