هەفتەی داهاتوو کۆمەڵی دادگەری کۆنگرەی پێنجەمی لە هەولێر دەبەستێت

ئاڤا نیوز

 

بڕیارە ڕۆژی شەممە 19ـی ئەم مانگە کۆمەڵی دادگەریی کوردستان کۆنگرەی پێنجەمی خۆی لە هەولێر ببەستێت و ماوەی دوو ڕۆژ بەردەوام دەبێت.

 

ئەوەی پێویستە بیزانیت: کۆمەڵی دادگەری لە ساڵی 31/5/2001،  دامەزراوە و تا ئێستا چوار کۆنگرەی بەستووە، حیزبەکە هەر چوار ساڵ جارێک کۆنگرە دەبەستێت.

 

لێدوانی فەرمی: عەباس محەممەد، وتەبێژی كۆنگرەی پێنجی كۆمەڵی دادگەری بە ئاڤا میدیای ڕاگەیاند: ئامادەکاری تەواو کراوە و ڕۆژی شەممە کۆنگرەکە لە شاری هەولێر دەبەسترێت.

 

- لە کۆنگرەکانی پێشتر بەرپرسی هەر 10 مەڵبەند لە سنووری ئۆرگانەکان هەڵدەبژێردران و لەگەڵ 25 ئەندامی سەرکردایەتی کە لە کۆنگرە هەڵدەبژێردران ژمارەیان دەبووە 35 ئەندامی ئەنجوومەنی سەرکردایەتی، بەڵام لەم کۆنگرەیە گۆڕانکاری کراوە و تەنیا 29 ئەندامی سەرکردایەتی لە کۆنگرە هەڵدەبژێردرێن و ئەوان بەرپرسی مەڵبەندەکان دیاری دەکەن.

 

- لە کۆنگرە دیاری دەکرێت چەند کەس یان کێ خۆی بۆ سەرۆکی کۆمەڵی دادگەری کاندید دەکات، میکانیزمی هەڵبژاردنی سەرۆکیش کۆمیسیۆن دیاری دەکات و خۆیشی سەرپەرشتی پرۆسەکە دەکات.

 

زانیاریی زیاتر: 907 ئەندامی کۆنگرە بەشداری دەکەن و کۆنگرەکە ماوەی دوو ڕۆژ بەردەوام دەبێت، هیچ میوانیكی ناوخۆ و دەرەوە بانگیشت نەکراوە.

 

باکگراوند: کۆنگرەی چوارەمی کۆمەڵی دادگەری لە 18/2/2021 لە شاری سلێمانی بەرێوەچوو، تێیدا ناونیشانی کەسی یەکەمی حیزبەکە لە ئەمیرەوە گۆڕا بۆ سەرۆک، پاشگری ئیسلامیش لە ناوی حیزبەکە کرایەوە و لە کۆمەڵی ئیسلامیی کوردستان کرایە: کۆمەڵی دادگەریی کوردستان.