زیاتر لە 17 هەزار خانەنشین پێنج مووچە و شەش مووچە بەیەکەوە وەردەگرن

ئاڤا نیوز

مامەڵەی زیاتر لە 17 هەزار خانەنشینی نوێ تەواو بووە و لەگەڵ مووچەی مانگی پێنج و مانگەکانی دواتر مووچەیان بۆ دەبەسترێت، پێنج مووچە و شەش مووچە بەیەکەوە وەردەگرن.

وێنە گەورەکە: پرۆسەی مامەڵەی خانەنشینانی نوێ خێرا کراوە و لە سەرەتای ئەمساڵەوە مامەڵەی زیاتر لە 22 هەزار کەسیان تەواو بووە، تەنیا نزیکەی پێنج هەزاریش مووچەیان بۆ بەستراوە، 14 هەزار خانەنشینیش هەرچەندە مامەڵەیان تەواو بووە و بۆ بەغدا نێردراوە، بەڵام بەهۆی نەناردنی مووچە تاوەکو ئێستا هیچ مووچەیەکیان وەرنەگرتووە، نزیکەی سێ هەزار خانەنشینیش لەگەڵ لیستی مووچەی مانگی حەوت ناویان بۆ بەغدا دەنێردرێت.

لێدوانی فەرمی: سەرچاوەیەک لە بەڕێوەبەرایەتیی گشتیی خانەنشینی هەرێمی کوردستان بە ئاڤای ڕاگەیاند، لەگەڵ دابەشکردنی مووچەی مانگی پێنج کە بڕیارە هەفتەی داهاتوو دابەش بکرێت، پێنج هەزار و 261 خانەنشینی نوێ مووچە وەردەگرن، ئەوان مووچەی مانگەکانی ڕابردووش وەردەگرن، واتە پێنج مووچە بەیەکەوە.

بە وتەی ئەو سەرچاوەیە، لەگەڵ مووچەی مانگی شەش کە بڕیارە دوای ناردنی مووچەی مانگی پێنج و دابەشکردنی، بەزووترین کات لەلایەن بەغداوە بنێردرێت، هەشت هەزار و 938 خانەنشین یەکەم مووچەی خانەنشینی و چەند مووچەیەکی دیکە بەیەکەوە وەردەگرن، .

مامەڵەی دوو هەزار و 700 خانەنشینی دیکە تەواو بووە، لەگەڵ لیستی مووچەی مانگی حەوت ناوەکانیان بۆ بەغدا دەنێردرێت، هەر کات مووچەی مانگی حەوت نێردرا، ئەوانیش هەموو مووچەکانیان بەیەکەوە وەردەگرن.

ئەمەش بزانە: خانەنشینانی نوێ لەو ڕۆژەوەی خانەنشین بوون تاوەکو ئەو مانگەی مووچەیان بۆ دەبەسترێت، سەرجەم مووچەکانیان بۆ قەرەبوو دەکرێتەوە، بۆنموونە فەرمانبەرێک مانگی یەکی ئەمساڵ خانەنشین بووبێت و مانگی حەوت مووچەی بۆ ببەسترێت، حەوت مووچە بەیەکەوە وەردەگرێت.