بەریتانیا ئیدانەی هێرشە درۆنییەکانی ئەم دواییەی سەر کوردستان دەکات

ئاڤا نیوز

بەریتانیا، ئیدانەی زنجیرە هێرشە درۆنییەکانی ئەم دواییەی سەرانسەری عێراقی کرد، بەتایبەتی ئەو هێرشانەی کە ژێرخانی وزەیان لە هەرێمی کوردستان کردووەتە ئامانج.

وێنە گەورەکە: لە چەند ڕۆژی ڕابردوودا، چەندین کێڵگەی نەوت و غاز لە هەرێمی کوردستان کراونەتە ئامانجی هێرشی درۆنی، کە بووەتە هۆی زیانی ماددی و ڕاگرتنی بەرهەمهێنان لە هەندێک لەو کێڵگانەدا.

ڕاگەیێنراوی فەرمی: باڵیۆزخانەی بەریتانیا لە بەغدا، ڕایگەیاند، "بەریتانیا ئیدانەی هێرشە درۆنییەکانی ئەم دواییەی سەرانسەری عێراق دەکات، لەنێویاندا ئەو هێرشانەی ئەم هەفتەیە کرانە سەر ژێرخانی وزە لە هەرێمی کوردستان."

باڵیۆزخانەکە جەختی لەوە کردەوە کە "ئەم هێرشانە هەڕەشەن بۆ سەر سەلامەتی هاووڵاتیان، زیان بە ئابووری عێراق دەگەیەنن و سەقامگیرییەکەی تێکدەدەن."

زانیاریی زیاتر: باڵیۆزخانەی بەریتانیا داوا لە حکومەتی عێراق دەکات کە "ڕێگری لەم هێرشانە بکات و ئەنجامدەرانی ئەم هێرشانە ڕووبەڕووی لێپرسینەوە بکاتەوە."