ئازادکردنی ڤیکەن یۆکسەکداغ و سەڵاحەددین دەمیرتاش ڕەتکرایەوە

ئاڤا نیوز

 

دادگای باڵای تاوانی 22ـی ئەنقەرە، داواکاریی ئازادکردنی هەریەک لە سەڵاحەددین دەمیرتاش و فیگەن یوکسێکداغ، هاوسەرۆکانی پێشووی هەدەپەی ڕەتکردەوە، بەهۆی ئەوەی هێشتا بڕیاری دادگای مافی مرۆڤی ئەوروپا یەکلا نەبووەتەوە. 

 

ئەوەی پێویستە بیزانیت: دوای ئەوەی دادگای مافی مرۆڤی ئەوروپا بۆ جاری سێیەم بڕیاری ئازادکردنی بۆ دەمیرتاش دەرکرد، هەفتەی ڕابردوو میدیاکانی نزیک لە دەم پارتی ڕایانگەیاند، نوێنەرانی دەم پارتی سەردانی دادگایان کردووە و داوای ئازادکردنی دەمیرتاش و سەرجەم بەندکراوانی "دۆسیەی کۆبانێ"ـیان پێشکەش بە دادگا کردووە.

 

ڕاگەیێنراوی فەرمی: دادگای باڵای تاوانی 22ـی ئەنقەرە،  بە ئاماژەدان بە بڕیاری دادگای مافی مرۆڤی ئەوروپا کە لە 8ی تەمموزی 2025 بۆ سەلاحەددین دەمیرتاش دەرچوو، ڕایگەیاند: ئەم بڕیارە هێشتا نەبووەتە بڕیاری کۆتایی و بەپێی بنەمای یاسایی دەستبەسەرکردنی زیندانییەکان بەردەوام دەبێت.

 

کاردانەوەکان: پارتی یەکسانی و دیموکراسی گەلان (دەم پارتی) سەبارەت بە ڕەتکردنەوەی داوای ئازادکردنەکە ڕایگەیاند، "ئەو دادگایەی داوای ئازادکردنەکەی ڕەتکردووەتەوە، بە پێشێلکردنی یاسا نێودەوڵەتییەکان و ماددەی 90ـی دەستوور، بە ئاشکرا تاوان ئەنجام دەدات. ئازادکردنی هاوڕێکانمان کە بە هۆکاری سیاسی لە زینداندا ڕاگیراون، تەنها پێویستییەکی یاسا و دادپەروەری نییە، بەڵکو لە هەمان کاتدا پێویستییەکی پرۆسەی ئاشتی و کۆمەڵگای دیموکراتییە".

 

ئەوەی پێشبینی دەکرا: دوای ئەوەی دەنگۆی ئازادکردنی دەمیرتاش لەم هەفتەیەدا بڵاوبووەوە، تەنانەت پەرلەمانتار و ئەندامانی دەم پارتی چاوەڕێ بوون دەمیرتاش و یوکسێکداغ و 80 کەسی دیکەی تۆمەتباری دۆسیەی کۆبانێ لەم هەفتەیە ئازاد بکرێن.

 

باکگراوند: سەلاحەددین دەمیرتاش لەگەڵ فیگەن یوکسێکداغ و ئەندامانی پێشووی سەر بە هەدەپە  نۆ ساڵ لەمەوبەر و لە ساڵی 2016 دەستگیر کرا، ئەو کاتە دادگای تاوانی ئەنقەرە سزای 48 ساڵ زیندانیکردنی بۆ دەمیرتاش دەرکرد.