ڕوانگه‌ی سووری: هه‌سه‌ده‌ و هاوپەیمانیی نێودەوڵەتیی مەشقی سەربازیی چڕ ئەنجامدەدەن

ئاڤا نیوز

ڕوانگه‌ی سووری بۆ مافه‌كانی مرۆڤ ڕایدەگه‌یەنێت، هێزه‌كانی هاوپه‌یمانیی نێوده‌وڵه‌تی له‌ حه‌سه‌كه،‌ مه‌شق و ڕاهێنانی سەربازییان بۆ ئەندامانی هەسەدە چڕكردووەتەوە و ئەو هێزانە لەسەر بەكارهێنانی چەكی مامناوەند و قوورس و تەكنەلۆژیای پێشكەوتووی سەربازی ڕادەهێنن.

 

چیرۆكی سەرەكی: دوای سەرهەڵدانی شەڕی دروزەکان و بەدەوییەکان لە شاری سوەیدای سووریا، گرژی و ئاڵۆزی کەوتە نێوان ئیسرائیل و سووریا، وەک پشتیوانییەک بۆ درووزەکان ئیسرائیل چەند شوێنێکی گرنگ و هەستیاری سووریای بۆردوومان کرد، ئێستا سەرەڕای ئەوەی ئاگربەست ڕاگەیێنراوە و دۆخەكە ئاسایی بووەتەوە، بەڵام هێزەكانی سووریای دیموكرات 'هەسەدە' بۆ هەرجۆرە ئەگەر و پەرەسەندنی گرژییەكان ئامادە دەكرێن.

 

ڕاگەیێنراوی فەرمی: ڕوانگه‌ی سووری بۆ مافه‌كانی مرۆڤ له‌ ڕاگه‌یێندراوێكدا ئاشكرایكردووە، له‌ بنکەی سه‌ربازیی قەسرەک لە باکووری حەسەکە، مەشقی چڕ و پڕی هاوپەیمانی نێودەوڵەتی و چەكدارانی هه‌سه‌ده‌ بۆ بەرەنگاربونەوەی فڕۆکەی بێفڕۆکەوان بە بەکارھێنانی چەکی لەیزەری به‌ڕێوه‌چووه و لەسەر بەكارهێنانی چەكی پێشكەوتوو و سیستمی تەكنەلۆژی ڕاهێنانیان پێ كراوە.

 

زانیاریی زیاتر: هەر بەپێی ڕاگەیێنراوەكەی ڕوانگەی سووری، لەنێو ڕێوشوێنێكی ئەمنیی تونددا، شاندێکی باڵای سەربازیی ئەمریکا لە ناوچەی قەسرەک لە باکووری پارێزگای حەسەکە لە ناوچەی تەل بەیدەرەوە هاتوونەتە ناو بنکەی هاوپەیمانی نێودەوڵەتی كە 20 ئۆتۆمبێلی سەربازی و دوو بارهەڵگری داخراوی لەخۆگرتووە، شاندە ئەمریكیەكەش بە هێلیكۆپتەر هاتوون.