سبەی ئاوی پڕۆژەی فریاگوزاریی خێرای هەولێر دەگاتە دەیان گەڕەک

ئاڤا نیوز

 

زیاتر لە هەفتەیەکە قۆناغی یەکەمی پڕۆژەی فریاگوزاریی هەولێر تەواو بووە و بە شێوەیەکی ئەزموونی ئاو بۆ گەڕەکەکان بەردراوەتەوە، بەڵام لە سبەی یەکشەممەوە قۆناغی ئەزموونی کۆتایی دێت و ئیدی ئاو دەگاتە دەیان گەڕەک.

 

لێدوانی فەرمی: هێمن نەزیف، سەرپەرشتیاری پڕۆژەی فریاگوزاریی خێرای هەولێر بە ئاڤا میدیای ڕاگەیاند: پێشووتر بەڵێنمان دابوو کە بە ساڵێک هێڵێکی پڕۆژەکە تەواو بکەین، بەڵێنەکەمان بەجێگەیاند و ماوەی زیاتر لە هەفتەیەک بە ئەزموونی ئاوەکە بەردراوەتەوە و گەیشتووەتە ماڵان، لەو بەشەی گەڕەکەکانی شاری هەولێر، کە بۆ قۆناغی یەکەم دیارکرابوون ئێستا 95%یان ئاوی فریاگوزاریی خێرایان پێگەیشتووە و ئەو بەشەی کە ماوە لە ڕۆژانی داهاتوو ئاویان پێدەگات.

 

- بە هەموو لێکدانەوە و پێوەرەکان ئەم پڕۆژەیە سێ ساڵی پێویست بوو، بەڵام هەمووان بەیەکەوە بە حکومەت و کۆمپانیا و خەڵکەوە بە شەو و ڕۆژ کارمان کرد بێ هیچ دابڕانێک و ئەوپەڕی توانامان خستەگەڕ بۆ ئەوەی بەو قۆناغەی ئێستا بگەین.

- درێژیی بۆریی پڕۆژەکە 600 کیلۆمەترە و ئێستا بە تەواوی ئامادەیە و ئاوی پێدا دەڕوات.

- دڵنیایی دەدەینە دانیشتووانی ئەو گەڕەکانەی کە لەم قۆناغەدا ئاوی پڕۆژەکەیان پێناگات کە تەنیا چەند مانگێکی کە زیاتر نابێت لە سێ مانگ، دیکە چاوەڕوان بن پڕۆژەکە 100% تەواو دەبێت و ئیدی گرفتی کەمئاوی تاوەکوو 30 ساڵی دیکە کۆتایی دێت.

ئەوەی پێویستە بیزانیت: نزیکەی 30 گەڕەکی شاری هەولێر کە دەکەونە نێوان شەقامی ڕەشکین و ڕێگای هەولێر - کۆیە، لە دەرەوەی شەقامی 120 مەتری لە قۆناغی یەکەمی پڕۆژەکە سوودمەندن و وا بڕیارە پێش کۆتایی ئەمساڵیش 100%ی پڕۆژەکە تەواو بێت.