لە هەولێر پێنجەمین كۆنگرەی كۆمەڵی دادگەری دەستپێدەكات

ئاڤا نیوز

لە كۆنگرەی پێنجەمی كۆمەڵی دادگەریی كوردستان، 78 ئەندام خۆیان كاندید كردووە بۆ بردنەوەی 29 پێگەی ئەنجوومەنی سەركردایەتیی حیزبەكە، كە دواجار حەوت ئەندامی ئەنجوومەنی باڵای حیزبەكەش هەر لەڕێگەی ئەندامانی ئەنجوومەنی سەركردایەتییەوە هەڵدەبژێردرێن.

 

چیرۆكی سەرەكی: ئەمڕۆ 19ـی تەمموزی 2025، لە هۆڵی سەعد عەبدوڵڵا لە شاری هەولێر بە بەشداری 900 ئەندامی حیزبەكە، كۆمەڵی دادگەری پێنجەمین كۆنگرەی خۆی دەبەستێت و ماوەی دوو ڕۆژ دەخایێنێت، 78 كەس كاندیدن بۆ ئەنجوومەنی سەركردایەتی حیزبەكە، كە 29 لە كاندیدەكان هەڵدەبژێردرێن، لەنێوان ئەو 29 هەڵبژێردراوەش، حەوتیان بۆ ئەندامی ئەنجوومەنی باڵا هەڵدەبژێردێن.

 

لێدوانی فەرمی: عەباس محەممەد، وتەبێژی كۆنگرەی پێنجەمی كۆمەڵی دادگەریی كوردستان تایبەت بە ئاڤا ڕایگەیاند، بە بەرنامەیەكی نوێی سیاسییەوە كاروبارەكانی ئاییندەمان ڕێكدەخەین كە بەپێی پەیڕەوی ناوخۆی حیزبەكە، هەر چوار ساڵ جارێك كۆنگرە دەبەستین، بەئامانجی خۆنوێكردنەوە و پێداچوونەوە بە كارەكانی ڕابردوو، خۆڕێكخستن بۆ پێشهاتەكانی داهاتووی كایەی سیاسیی هەرێمی كوردستان و عێراق.

 

زانیاریی زیاتر: وتەبێژی كۆنگرەی كۆمەڵی دادگەری باسی لەوەشكرد، لەنێو ئەوانەی خۆیان بۆ ئەنجوومەنی سەركردایەتی حیزب بەربژێر كردووە، ژمارەیەكی زۆریان گەنجن كە دەرفەتیان بۆ ڕەخساوە بۆ كاری سیاسی بێنە پێش و سوود لە توانا و لێهاتووییان ببینرێت. ئافرەتانیش ڕێژەی 25% بەشدارن لە كۆنگرە و ئەنجوومەنی داهاتووی سەركردایەتی حیزبەكەش پێویستە ڕێژەی ئافرەت 25%ـدا بێت.

 

باكگراوند: كۆمەڵی دادگەریی كوردستان لە دواهەمین هەڵبژاردنی پەرلەمانی كوردستاندا، تەنها سێ كورسی بەدەستهێنا كە ئەو ئەنجامە لەئاست خواستی حیزبەكە نەبوو، بۆ هەڵبژاردنی داهاتووی پەرلەمانی عێراقیش كە بڕیارە لە مانگی تشرینی دووەمی ئەمساڵ بەڕێوەبچێت، كۆمەڵی دادگەریی كوردستان بە بەرنامەیەكی تۆكمە خۆی بۆ بەشداریكردن ئامادەكردووە.