پارتی و یەكێتی بۆ پێكهێنانی حكومەت جارێكی دیكە كۆ دەبنەوە

ئاڤا نیوز

پارتی دیموكراتی كوردستان و یەكێتیی نیشتمانیی كوردستان دەست بە كۆبوونەوەكانیان بۆ پێكهێنانی كابینەی دەی حكومەتی هەرێمی كوردستان دەكەنەوە و سەرچاوەیەكی باڵای یەكێتیش وادەی كۆبوونەوەی داهاتوو ئاشكرا دەكات.

وێنە گەورەكە: پارتی و یەكێتی وەك براوەی یەكەم و دووەمی هەڵبژاردنی پەرلەمانی كوردستان، لەماوەی ڕابردوودا زنجیرەیەك كۆبوونەوەیان لە ئاستی باڵا و تیمی تەكنیكی بۆ پێكهێنانی كابینەی دەیەمی حكومەتی هەرێمی كوردستان کردووە، بەپێی گوتەی بەرپرسانی هەردوولا گفتوگۆكان گەیشتوونەتە خاڵەكانی كۆتایی و ڕاگەیاندنی كابینەكە نزیكە.

لێدوانی فەرمی: سەرچاوەیەك لە مەكتەبی سیاسیی یەكێتیی نیشتمانیی كوردستان بە ئاڤا میدیای ڕاگەیاند: وابڕیارە ئەم هەفتەیە جارێكی دیكەی یەكێتی و پارتی تایبەت بۆ گفتوگۆكردن لەسەر پێكهێنانی كابینەی دەی حكومەت كۆببنەوە بەڵام تاوەكوو ئێستا دیار نییە كە شاندی پارتی دێن بۆ سلێمانی یان شاندی یەكێتی لە سلێمانییەوە دەچن بۆ هەولێر.

- تیمی یەكێتی چەند گۆڕانكارییەكیان لە داواكارییەكانیان بۆ پۆستەكان نێو حكومەت كردووە و چاوەڕوان دەكرێت لەم كۆبوونەوەیەدا بیخەنە ڕوو هاوكات شاندی دانوستاندنكاری پارتیش چەند خاڵێك پێشكەش دەكەن.

زانیاریی زیاتر: دوایین كۆبوونەوەی باڵای نێوان پارتی و یەكێتی ڕۆژی 14-7-2025 لە پیرمام بە ئامادەبوونی سەرۆك بارزانی بەڕێوەچوو، هەرچەندە بابەتی سەرەكیی كۆبوونەوەكە پرسی ڕێككەوتنی نێوان هەولێر و بەغدا و مووچەی فەرمانبەران بوو بەڵام بەپێی زانیارییەكانی ئاڤا میدیا، لە كۆبوونەوەكەدا باس لە پرسی پێكهێنانی كابینەی دەی حكومەت و دەستپێكردنەوەی كۆبوونەوەكانی شاندی دانوستاندنكاری هەردوولا كراوە و هەردوولا هاوڕا بوونە كە هەنگاوەكانی پێكهێنانی كابینەی دە خێراتر بكرێت.

لەلایەكی دیكەوە: لە ماوەی ڕابردوودا پێشەوا هەورامانی، گوتەبێژی حكومەتی هەرێمی كوردستان سەبارەت بە پێكهێنانی كابینەی تازەی حكومەت بە ئاڤا میدیای ڕاگەیاند:   گفتوگۆكان بۆ پێكهێنانی حكومەت دەچنە قۆناغێكی دیكەوە و چڕتر دەبنەوە، سەرۆكوەزیران مەسرور بارزانی  زیاتر جەخت لەسەر ئەوە دەكاتەوە كە كابینەی دەی حكومەت زوو پێكبهێندرێت و پۆستێك و پلەیەك و داواكارییەكی حیزبی نەبێتە هۆی دواخستنی، پێویستە هەر لایەنێك واقیعیانە سەیری پڕۆسەكە بكات نەك لە قەبارەی خۆی زیاتر.