وەزارەتی دارایی کاتی ناردنی مووچە ئاشكرا دەکات

ئاڤا نیوز

سەرچاوەیەكی باڵا لە وەزارەتی دارایی و ئابووریی حكومەتی هەرێمی كوردستان ئاشكرای دەكات كە خشتەی مووچەی مانگی پێنج ئامادەیە و ئەم هەفتەیە مووچە دابەش دەكرێت.

وێنە گەورەكە: بەهۆی نەناردنی پارە لەلایەن حكومەتی عێراقەوە، 79 ڕۆژە مووچەی فەرمانبەرانی هەرێمی كوردستان نەدراوە، دوای گفتوگۆیەکی زۆر و چەندین کۆبوونەوە و گۆڕینەوەی پەیام، هەردوو حکومەتی عێراق و کوردستان لەبارەی نەوت و داهاتی ناوخۆ و مووچە ڕێککەوتن و ئەم هەفتەیە دەچێتە باری جێبەجێكردنەوە.

لێدوانی فەرمی: سەرچاوەیەكی باڵا لە وەزارەتی دارایی و ئابووریی حكومەتی هەرێمی كوردستان بە ئاڤا میدیای ڕاگەیاند: ئێوارەی ڕۆژی پێنجشەممە سەرجەم ئەو ڕێككارانەی كە پێویستن بۆ دابەشكردنی مووچەی مانگی پێنج لەلایەن وەزارەتی داراییەوە ئەنجام دراون، خشتەی مووچە ئامادەیە و لە ماوەی سێ بۆ پێنج ڕۆژ مووچەی تەواوی فەرمانبەران دابەش دەكرێت.

- میزان موراجەعەی مانگی پێنج و شەش ئامادەیە هەر كاتێك بەغدا داوای بكات دەینێرین، داهاتی ناوخۆش بە شێوەی ( ئیشعار) ئاگاداركردنەوە دەنێرین و هیچ ئاستەنگێك نییە.

  چاوەڕوان دەکرێت دووشەممە یان سێشەممەی ئەم هەفتەیە عێراق مووچەی فەرمانبەران بنرێت.

• خشتەی دابەشکردنی مووچە هاوشێوەی مانگی چوارە و گۆڕانکارییەکی ئەوتۆی تێدا ناکرێت. لیستی مووچەی مانگی چوار بە خانەنشینانی مەدەنی و خاوەن پێداویستییە تایبەتەکان و کەسوکاری شەهیدان و ئەنفالکراوان دەستیپێکرد و بە سێ ڕۆژ تەواو بوو.
  
  

ئەوەی پێویستە بیزانیت: بە گوێرەی وتەی سەرچاوەکەی وەزارەتی دارایی کە بۆ ئاڤای ئاشکرا کردووە، لەگەڵ گەیشتنی پارە ڕاستەوخۆ دەست بە دابەشکردنی مووچە دەکرێت.