ئاڤا هۆکاری هاتنی ژمارەیەک ئۆتۆمبێلی هەڵگرتنی پارە بۆ هەولێر ئاشکرا دەکات

ئاڤا نیوز

 

لقی هەولێری بانکی ناوەندیی عێراق لەبارەی ئەو ئۆتۆمبێلانەی لە پردێ بینراون و بەرەو هەولێر چوون، ڕوونکردنەوە دەدات و دەڵێت، "چوونی ئەو ئۆتۆمبێلانە بۆ ئاڵوگۆڕی پارەیە لەنێوان لقەکانی بانکی ناوەندی".

 

چیرۆکی سەرەکی: ئەمڕۆ شەممە ڤیدیۆ و وێنەی ژمارەیەک ئۆتۆمبێلی هەڵگرتنی پارە لە تۆڕە کۆمەڵایەتییەکان بڵاوکرایەوە، دواتر دەنگۆی ئەوە هەبوو ئەو ئۆتۆمبێلانە پارەی مووچەیان گواستووەتەوە لقی بانکی ناوەندی عێراق لە هەولێر.

زانیاریی ئاڤا: سەرچاوەیەک لە لقی هەولێری بانکی ناوەندیی عێراق بە ئاڤای ڕاگەیاند، ئەم ئۆتۆمبێلانەی لە پردێ بینراون و بەرەو لقی هەولێری بانکی ناوەندی چوون، پەیوەندییان بە مووچەوە نییە، بەڵکو تەنیا بۆ ئاڵوگۆڕی پارەیە لەنێوان لقەکانی بانکی ناوەندی.

 

زانیاریی زیاتر: پێشتر ئاڤا بڵاویکردەوە کە لە لقی هەولێری بانکی ناوەندی پارەی مووچە ئامادەیە، هەرکاتێک بەغدا ڕەزامەندی بدات ئەوان دەتوانن ڕاستەوخۆ پارەی مووچە خەرج بکەن.

 

ئەوەی پێویستە بیزانیت: دوای پەسەندکردنی لەلایەن ئەنجوومەنی وەزیرانی کوردستان و واژۆکردنی لەلایەن سەرۆکوەزیران مەسرور بارزانی، ئەنجوومەنی وەزیرانی عێراق لە کۆبوونەوەیەکی نائاساییدا لێکتێگەیشتنی نێوان هەولێر و بەغدای پەسەند کرد و سوودانیش واژۆی کرد. دواتر بڕیاری ناردنی یەک مووچە درا و پێشبینی دەکرێت لەم هەفتەیەدا بەغدا مووچەی مانگی پێنجی فەرمانبەران خەرج بکات.