سۆران عومەر لەبارەی بەشدارینەكردنی لە كۆنگرەی حیزبەکەی: لە كۆمەڵ بپرسن

ئاڤا نیوز

سۆران عومەر، سەرۆكی فراكسیۆنی كۆمەڵی دادگەریی كوردستان لە پەرلەمانی عێراق لەبارەی بەشدارینەكردنی لە كۆنگرەی پێنجەمی حیزبەکەی دەڵێت: "لە برادەرانی كۆمەڵ بپرسن." لەبەرامبەر ئەو قسانەدا سەرۆکی کۆمەڵی دادگەری دەڵێت، "كەسانێك لە پەنای كۆمەڵدا ئیمتیازی ماددی و مەعنەوییان وەرگرت، پاشان بێ ئەمەك بوون بەرامبەر حیزبەكەیان."

 

چیرۆكی سەرەكی: ئەمڕۆ شەممە لە شاری هەولێر، كۆنگرەی پێنجەمی كۆمەڵی دادگەریی كوردستان بە بەشداریی 900 ئەندامی ئەو حیزبە دەستیپێكرد. ئەوەی جێگەی سەرنج بوو, سەرۆكی فراكسیۆنی كۆمەڵی دادگەری لە پەرلەمانی عێراق و تاكە پەرلەمانتاری ئەو حیزبە بەشداری نەكرد.

 

لێدوانی فەرمی: سۆران عومەر لەبارەی بەشدارینەكردنی لە كۆنگرەی حیزبەكەی وتی، "لە كۆمەڵ بپرسن."

 

ئەوەی پێویستە بیزانیت: لە وەڵامی پرسیارێکی ئاڤا کە ئایا بانگهێشتی بەشداریكردن لە كۆنگرەكە كراوە یاخود نا، سۆران عومەر لە وەڵامدا وتی: "سەدان جار بانگهێشت كراوم". سەرۆکی فراکسیۆنی کۆمەڵ ئامادە نەبوو هیچ ڕوونكردنەوەیەكی دیكە بدا.

 

لەبەرامبەردا: لەمیانی وتاری عەلی باپیر، سەرۆكی كۆمەڵی دادگەریی كوردستان لە كۆنگرەی پێنجەمی حیزبەكەی وتی، "كەسانێك لە پەنای كۆمەڵدا ئیمتیازی ماددی و مەعنەوییان وەرگرت، پاشان بێ ئەمەك بوون بەرامبەر حیزبەكەیان، ئەوەش وەك خاڵی بێهێز سەیر دەكرێت".

سەرۆکی کۆمەڵی دادگەری ڕوونیشی كردەوە، هەندێكیان تەنانەت ڕیزەكانی كۆمەڵی دادگەریشیان جێهێشتووە بۆ ئەوەی لە پابەندی دارایی حیزبەكەیان خۆدەرباز بكەن، لەكاتێكدا ئەوان بە دەنگی لایەنگرانی كۆمەڵی دادگەری بوونەتە پەرلەمانتار و خاوەنی ئیمتیاز.