مەسرور بارزانی و باڵیۆزی ئەمریکا لە عێراق: پێویستە بەغدا لە زووترین کاتدا مووچە بنێرێت

ئاڤا نیوز

سەرۆكوەزیران مەسرور بارزانی و هەڵسوڕێنەری باڵیۆزخانەی ئەمریكا لە عێراق كۆبوونەوە و باسی مووچەی فەرمانبەران و هەناردەكردنەوەی نەوت و پێكهێنانی كابینەی دەی حكومەتی هەرێمی كوردستانیان كرد.

وێنە گەورەكە: ئەمڕۆ شەممە 19-7-2025، سەرۆكوەزیران مەسرور بارزانی، پێشوازی لە ستیڤن ڤەیگن،  و ستیڤ بیتنەر کونسوڵی گشتیی ئەمەریکا لە هەرێمی کوردستان کرد .

بڵاوكراوەی فەرمی: نووسینگەی ڕاگەیاندنی سەرۆكوەزیران مەسرور بارزانی بڵاوی كردەوە: لە کۆبوونەوەکەدا دۆخی گشتیی عێراق و ناوچەکە و پتەوکردنی زیاتری پەیوەندیی دوولایەنە تاوتوێ کرا، هەڵسوڕێنەری باڵیۆزخانەی ئەمەریکا لە عێراق پشتیوانیی وڵاتەکەی بۆ قەوارەی فیدراڵی و هەرێمی کوردستانێکی بە هێز دووپات کردەوە.

- سەرۆکوەزیران سوپاسی پشتگیریی بەردەوامیی ویلاتە یەکگرتووەکانی ئەمەریکای لە هەرێمی کوردستان کرد.

-هەردوولا هاوڕابوون لەسەر ئەوەی کە پێویستە حکومەتی فیدراڵ لە زووترین کاتدا، مووچە و شایستە داراییەکانی هەرێمی کوردستان بنێرێت و لە نزیکترین کاتیشدا، هەناردەکردنی نەوتی هەرێم لە ڕێگەی بەندەری جەیهانی تورکیا دەست پێ بکاتەوە .

-دەبێت هێرشی تیرۆریستی و تێکدەرانەی درۆنەکان بۆ کێڵگە نەوتییەکان و ژێرخانی وزەی هەرێم بوەستێت.

-هەردوولا هاوڕابوون لەسەر ئەوەی کە پێویستە کابینەی نوێی حکومەتی هەرێمی کوردستان پێش هەڵبژاردنی پەرلەمانی عێراق پێکبهێنرێت.