پەرلەمانی عێراق لەبارەی بەئامانجگرتنی کێڵگە نەوتییەکانی کوردستان کۆبوونەوەیەکی نائاسایی دەکات

ئاڤا نیوز

ئەنجوومەنی نوێنەرانی عێراق دانیشتنێکی نائاسایی بۆ تاوتوێکردنی دەرەنجامەکانی کارەساتی ئاگرکەوتنەوەکەی پارێزگای کوت و هێرشە درۆنییەکانی ئەم دواییە بۆ سەر ژێرخانی هەرێمی کوردستان دەکات.

 

ئەوەی پێویستە بیزانیت: ئەم دانیشتنە نائاساییە لەکاتێکدایە کە هەردوو ڕووداوەکە کاردانەوەی بەرفراوانیان لەسەر ئاستی عێراق و هەرێمی کوردستان لێکەوتووەتەوە. هەردوو ڕووداوەکەش زیانی گیانی و ماددییان لێکەوتووەتەوە.

 

ڕاگەیێنراوی فەرمی: بەگوێرەی ڕاگەیێنراوی نووسینگەی پەرلەمانی عێراق، بڕیارە ڕۆژی دووشەممە، 21ـی تەمموزی 2025، کاتژمێر 1ـی پاشنیوەڕۆ دانیشتنێکی نائاسایی بۆ تاوتوێکردنی دوو بابەتی گرنگ بکات.

 

ئەوەی پێویستە بیزانیت: کارنامەی دانیشتنەکە دوو تەوەرەی سەرەکی لەخۆدەگرێت:

 

یەکەم: گفتوگۆیەکی گشتی سەبارەت بە ڕووداوی ئاگرکەوتنەوەکەی کوت.

دووەم: گفتوگۆیەکی گشتی سەبارەت بە "هێرشە تیرۆرستییەکان بە درۆنی بۆمبڕێژکراو بۆ سەر ژێرخانی هەرێمی کوردستان."

 

باکگراوند: لە چەند ڕۆژی ڕابردوودا کێڵگە نەوتییەکانی هەرێمی کوردستان بوونە ئامانجی درۆنە بۆمبڕێژکراوەکان، بەهۆی هێرشەکانیشەوە بەرهەمهێنان لە بەشێکی کێڵگەکان بەشێوەیەکی کاتی وەستا، ئەمەش کاریگەریی نەرێنی لەسەر ئاستی بەرهەمهێنانی ئەو کێڵگانە و ژێرخانی ئابووریی عێراق و هەرێمی کوردستان دروست کرد.

 

- شەوی 2025-07-16، لە شاری کوت لە پارێزگای واستی ناوەڕاستی عێراق، ئاگرێکی گەورە لە مۆڵێک کەوتەوە، بەهۆی نەبوونی مەرجی تەندروستیی و سەلامەتی، 61 کەس گیانیان لەدەست دا و 38 کەسی دیکەش برینداربوون.