تەرمی ئەو گەنجەی لە ئاوی گەلی عەلی بەگدا خنكا، دەدۆزرێتەوە

ئاڤا نیوز

گەنجێكی كورد لە ڕووباری گەلی عەلی بەگ دەخنكێت، وتەبێژی بەرگریی شارستانیی سۆرانیش زانیاری لەبارەی ڕووداوەكە بە ئاڤا دەدات.

 

چیرۆکی سەرەکی: كەمێك لەمەوبەر گەنجێكی كورد كە بۆ مەبەستی گەشتیاری و مەلەكردن سەردانی ناوچە گەشتیارییەكانی سنووری ئیدارەی سۆرانی كردبوو، دەكەوێتە نێو ئاوی ڕووباری گەلی عەلی بەگ و بەهۆی شەپۆلی بەخوڕی ڕووبارەكە دەخنكێت.

 

لێدوانی فەرمی: ڕەوەند هاودیانی، وتەبێژی بەرگریی شارستانیی سۆران تایبەت بە ئاڤا ڕایگەیاند، هەرچەندە بەپێی زانیارییە سەرەتاییەكان ئەوەی بە ئێمە وترا گەنجەكە تەمەنی 25 ساڵە، بەڵام دەركەوتووە تەمەنی 19 ساڵە و بەهۆی مەلەكردن لە ناوچەی تەوژمی ئاوی گەلی عەلی بەگ، خنكاوە.

هاودیانی ئاماژەی بەوەشكرد دوای گەڕان و پشكنینی تیمەكانی پاراستنی ئاوی ڕووباری سۆران و تیمەكانی ڕزگاركردن، توانرا تەرمی گەنجەكە بدۆزرێتەوە و لە ئێستادا تەرمەكەی ڕەوانەی نەخۆشخانەی ئاشتی لە شاری سۆران كراوە و دواتریش ڕەوانەی پزیشكی دادی دەكرێت، بۆ زانینی هۆكارەكانی خنكانی و دەسكەوتنی زانیاریی ورد لەبارەی ڕووداوەكە.