نوێنەرایەتیی حكومەتی هەرێم لە بەغدا هەوڵەكانی بۆ چارەسەریی كێشە داراییەكان چڕدەكاتەوە

ئاڤا نیوز

نوێنەرایەتی حكومەتی هەرێمی كوردستان لە بەغدا، بۆ چارەسەركردنی كێشە داراییە هەڵپەسێردراوەكانی نێوان هەولێر و بەغدا، هەماهەنگی لەگەڵ دەستەی گشتیی چاودێریی دابەشكردنی داهاتی فیدراڵی دەكات.

چیرۆكی سەرەكی: ئەمڕۆ یەكشەممە 20ـی تەمموز، فارس عیسا، سەرۆكی نوێنەرایەتیی حكومەتی هەرێمی كوردستان لە بەغدا، سەردانى دەستەى چاودێریی تەرخانکردنى داهاتى فیدراڵى كرد و لەلایەن سۆزان عەبدوڵڵا، سەرۆكی دەستەكە پێشوازی لێكرا.

باس لە چڕكردنەوەی هەوڵەكان بۆ چارەسەركردنی كێشە داراییەكانی نێوان هەولێر و بەغدا کرا، بەمەبەستی هێنانەدی دادپەروەری لە دابەشكردنی پشكی هەرێمی كوردستان لە بودجەی گشتیی عێراقدا.

لێدوانی فەرمی: فارس عیسا، سەرۆكی نوێنەرایەتیی حكومەتی هەرێمی كوردستان لە بەغدا ڕایگەیاند، لەگەڵ سەرۆكی دەستەی گشتیی چاودێریی دابەشكردنی داهاتی فیدراڵی هاوڕا بووین لە پتەوكردنی هاوكاری و هەماهەنگی لەنێوان دامودەزگا فەرمییەكانی هەردوو حكومەتی هەرێمی كوردستان و فیدراڵی، لەپێناو دۆزینەوەی چارەسەری بنەڕەتی بۆ كێشە داراییەكان.

لەلایەكی دیكەوە: سەرۆکی دەزگای گشتیی چاودێری دابەشکردنی داهاتی فیدراڵی، ستایشی هەوڵەکانى نوێنەرایەتیی حکومەتی هەرێمی کوردستانی کرد ، لە پاڵپشتیکردنى هەوڵەکان، بۆ چارەسەرکردنی کێشە داراییەکانی نێوان هەولێر و بەغدا و بەڵێنی دا لەگەڵ دامودەزگا پەیوەندیدارەكان لە هەوڵدابن بۆ چارەسەركردنی كێشەكان لەنزیكترین كاتدا.