ئەمریکا بۆ ئاڤا: داوا لە هەولێر و بەغدا دەکەین پرسی مووچە و نەوت چارەسەر بکەن

ئاڤا نیوز

ئەمریکا جەخت لە گرنگی ڕێککەوتنی هەولێر و بەغدا لەسەر پرسی مووچە دەکاتەوە و دەڵێت، پێویستە ڕێز لە گرێبەستی کۆمپانیا ئەمریکییەکان بگیرێت.

وێنە گەورەکە: سەرەڕای پابەندبوونی حکومەتی هەرێمی کوردستان بە هەموو مەرجەکانی عێراق و پەسندکردنی لێکتێگەیشتن لەلایەن سەرۆکوەزیرانی کوردستانەوە، بەغدا بەردەوامە لە بیانووهێنانەوە بۆ خەرجکردنی مووچە و هەناردەکردنەوەی نەوت.

لێدوانی فەرمی: وتەبێژێک لە وەزارەتی دەرەوەی ئەمریکا بە ئاڤای ڕاگەیاند، "ئێمە بەردەوام هانی بەغدا و هەولێرمان داوە کە کێشەکانیان لەبارەی مووچە و دەستپێکردنەوەی هەناردەی نەوت لە بۆریی عێراق-تورکیا چارەسەر بکەن.

جەختی لەوەشکردەوە، چارەسەرکردنی خێرای ئەم کێشانە، ئاماژەیەک دەبێت بۆ ئەوەی کە عێراق بەرژەوەندیی گەلەکەی دەخاتە پێشینەی کارەکانییەوە و پابەندە بە دروستکردنی ژینگەیەک کە تێیدا کۆمپانیاکان خواستی وەبەرهێنانیان هەبێت. هێنانەکایەی ئەم ژینگە لەبارە بۆ بازرگانی، پێویستی بە ڕێزگرتن لە بەندی گرێبەستەکان و دابینکردنی گەرەنتیی ئەمنیی پێویست هەیە.

ئاماژەی بەوەشکرد، نیشاندانی پابەندبوون بە پاراستن و پشتیوانیکردنی وەبەرهێنانی نێودەوڵەتی، بەتایبەتی لەم بارودۆخەی ئێستا گرنگە کە تێیدا هێرشە درۆنییەکان، بەبێ هیچ لێپرسینەوەیەک، کارەکانی کۆمپانیا ئەمریکی و نێودەوڵەتییەکانی دیکەیان لە هەرێمی کوردستانی عێراق کردووەتە ئامانج.

لەلایەکی دیکەوە: بڕیارە ئەمڕۆ دووشەممە ئەنجوومەنی ئابووریی عێراق بەسەرپەرشتی د. فوئاد حوسێن، سەرۆکی ئەنجوومەنەکە و وەزیری دارایی عێراق، بە ئامادەبونی حەیان عەبدوڵغەنی، وەزیری نەوتی کۆببێتەوە و لەوێ فشار لەسەر تەیف سامی بکرێ تا مووچە بنێرێت.