بەرپرسێکی پێشووی کەرکووک لەکاتی وەرگرتنی بەرتیل دەستگیر دەکرێت

ئاڤا نیوز

دەستەی دەستپاکی عێراق دەڵێت، بەرپرسێکی پێشووی شارەوانی کەرکووکیان لەکاتی وەرگرتنی بەرتیلدا دەستگیرکردووە، تۆمەتبارەکە خاوەن دوکانێکی هەراسانکردبوو و داوای بەرتیلی لێکردبوو.

وێنە گەورەکە: گەندەڵیی دارایی و کارگێڕیی لە عێراق بە گەورەترین ئاستەنگی بەردەم چاکسازی و بونیادنانەوەی دامەزراوەکانی دەوڵەت دادەنرێت، هەوڵەکانی دەستەی دەستپاکیش لە چوارچێوەی هەوڵەکانی ڕووبەڕووبوونەوەی گەندەڵی دایە و ناوەناوە دۆسیەی گەندەڵی لەسەر بەرپرسان و فەرمانبەرانی دەوڵەت دەکاتەوە.

ڕاگەیێنراوی فەرمی: دەستەی دەستپاکی عێراق بڵاویکردەوە، بەرپرسی پێشووی بەشی زیادەڕۆیی لە بنکەی پێنجی شارەوانی سەر بە شارەوانیی کەرکووک، خاوەن دووکانێکی فرۆشتنی ماسی هەراسانکردبوو و داوای دوو ملیۆن و 500 هەزار دینار بەرتیلی لێکردبوو، دوای لێکۆڵینەوە، بەدواداچوون و دانانی بۆسەش بۆی، ئەو بەرپرسەی پێشووی شارەوانی لەکاتی وەرگرتنی قۆناغی یەکەمی بەرتیلەکە لەو هاووڵاتییە دەستگیرکرا.

ئەوەشی خستووەتەڕوو، دۆسیەی لێکۆڵینەوە بۆ تۆمەتبار کرایەوە و دادوەری لێکۆڵینەوەی کەرکووک پاڵپشت بە دۆسیەکانی دەستپاکی، بڕیاری دەستگیرکردن و ڕاگرتنی تۆمەتباری دەرکرد.