عێراق و تورکیا و وڵاتانی عەرەبی پێشوازی لە بڕیاری ئاگربەستی غەززە دەکەن

ئاڤا نیوز

دوای بڕیارەکەی ئەنجوومەنی ئاسایش بۆ ئاگربەستی غەززە، وڵاتانی کەنداو، عەرەبی، ڕێکخراوە ناوچەیی و نێودەوڵەتییەکان پێشوازییان لە بڕیارەکە کرد.

 

وێنە گەورەکە: لە کۆبوونەوەی ئەمڕۆی ئەنجوومەنی ئاسایش 14 ئەندامی ئەنجوومەنەکە دەنگیان بە بەڵێ دا و ئەمریکا کە جاری پێشوو بۆ ڕێگریکردن لە بڕیارەکە ڤیتۆی بەکارهێنا، ئەمجارە خۆی لە دەنگدان بەدوور گرت و بڕیارەکە پەسەند کرا.

 

لێدوانە فەرمییەکان:

تورکیا: بڕیارەکە هەنگاوێکی ئەرێنییە، داواکارین ئیسرائیل لە زووترین کاتدا جێبەجێی بکات.  داوا لە کۆمەڵگەی نێودەوڵەتی دەکەین هەڵوێستی هاوبەش دژی ئیسرائیل بگرنەبەر بۆ کۆتاییهێنان بە کارەساتی مرۆیی لە غەززە و دۆزینەوەی چارەسەرێکی هەمیشەیی بۆ پرسی ئیسرائیل و فەڵەستین.

عێراق: داوا لە کۆمەڵگەی نێودەوڵەتی دەکەین بە ئەرکی خۆی هەڵبستێت بۆ وەستاندنی هێرشەکانی ئیسرائیل، جەخت لەسەر پێویستی کۆتاییهێنان بە ئازارەکانی گەلی فەلەستین دەکەینەوە.

 

سعودیە: ئەم بڕیارە هەنگاوێکی دروستە بۆ گەیشتن بە وەستاندنی هەمەلایەنەی ئۆپەراسیۆنە سەربازییەکان و پاراستنی هاووڵاتیانی غەززە.

 

بەحرەین: هەنگاوێکی گرنگە پاراستنی هاوڵاتیان و دروستکردنی کەشێکی سەلامەت بۆ دابینکردنی پێداویستییە مرۆییە پێویستەکانی دانیشتووان.

 

ئیمارات: بڕیارەکە هەنگاوێکی زۆر گرنگە، چونکە ڕێگە بە گەیاندنی هاوکارییەکان بۆ خەڵکی غەززە دەدات.

 

عومان: ئەنجوومەنی ئاسایش بەرپرسە لە جێبەجێکردنی سەرجەم بریارنامەکانی پەیوەست بە ململانێی عەرەبی و ئیسرائیل، لە پێناو بەدیهێنانی ئاشتییەکی دادپەروەرانە و هەمەلایەنە.

 

میسر: ڕێکخەری باڵای نەتەوە یەکگرتووەکان دیاری دەکرێت و میکانیزمێکی نێودەوڵەتی بۆ گەیاندنی هاوکارییە مرۆییەکان بۆ کەرتی غەززە دادەنرێت. 

 

قەتەر: پێشوازی لە بڕیارەکەی ئەنجوومەنی ئاسایش دەکەین و هیوادارین کە هەنگاوێک بێت بۆ وەستاندنی هەمیشەیی شەڕ لە کەرتی غەززە.

 

باکگراوند: ئەنجوومەنی ئاسایش بە دەنگی 14 ئەندام بڕیاری " ئاگربەستی غەززە" بۆ وەستاندنی شەڕ و ئالوگۆڕی بارمتەکان پەسەند کرد.