ئێران چەند دەروازەیەکی نوێ لە مەرزی نێودەوڵەتیی حاجی ئۆمەران دەکاتەوە

ئاڤا نیوز

حکومەتی ئێران ئامادەکارییەکانی بۆ زیارەتکارانی چلەی ئیمام حوسێن دەستپێکردووە و بۆ ئەو مەبەستەش چەند دەروازەیەکی نوێی تایبەت بە هاتووچۆی زیارەتکاران لە مەرزی نێودەوڵەتیی حاجی ئۆمەران دەکاتەوە.

وێنە گەورەکە: ساڵانە بۆ ڕێوڕەسمەکانی چلەی ئیمام حوسێن هەزاران زیارەتکاری ئێرانی سەردانی شارەکانی نەجەف و کەربەلا و مەزارگەکانی شیعە لە عێراق دەکەن. بەشێکی زۆری ئەو زیارەتکارانەش لەڕێگەی دەروازەکانی هەرێمی کوردستانەوە دێنە نێو عێراق و بەشداریی لە ڕێوڕەسمەکاندا دەکەن.

ئەوەی پێویستە بیزانیت: حکومەتی ئێران 81 دەروازەی نوێی تایبەت بە هاتووچۆی زیارەتکارانی چلەی ئیمام حوسێنی لە مەرزی نێودەوڵەتیی حاجی ئۆمەران کردووەتەوە، بە جۆرێک لە دیوی ئێران 36 دەروازە بۆ چوونە نێو خاکی هەرێمی کوردستان و 45 دەروازەش لە دیوی خاکی هەرێمی کوردستان کراونەتەوە تاوەکو زیارەتکاران بە خێرایی و لەماوەی کەمتر لە پێنج خولەکدا تێپەڕ ببن.

زانیاریی زیاتر: ساڵی ڕابردوو زیاتر له‌ 130 هه‌زار زیارەتکار لەڕێگەی‌ ده‌روازه‌ی نێودەوڵەتیی حاجی ئۆمەرانەوە بەشدارییان لە ڕێوڕەسمەکانی چلەی ئیمام حوسێندا کردووە و پێشبینیش دەکرێت ئەمساڵ ژمارەکە زیاد بکات.