پەرلەمانتارێکی عێراق پەردە لەسەر دۆسیەیەکی گەندەڵی هەڵدەداتەوە کە ساڵانە تریلیۆنێک دینار بەهەدەر دەدات

ئاڤا نیوز

پەرلەمانتارێکی سەربەخۆ دۆسیەیەکی گەورەی گەندەڵی لە وەزارەتی بازرگانی ئاشکرا دەکات و ئاماژە بۆ ئەوە دەکات، گرێبەستێکی دابینکردنی خۆراک ساڵانە بڕی یەک تریلیۆن دینار لە پارەی گشتی بەهەدەر دەدات.

وێنە گەورەکە: گەندەڵی بووەتە دیاردەیەکی جیهانی و باڵی بەسەر هەموو بوارەکانی ژیاندا کێشاوە هەموو پێکەوە و باس لەوە دەکەن کە گەندەڵی لە هەر شوێنێک بێت دەبێتە کۆسپ لەبەردەم بووژانەوەی ئابووری و گەشەکردنیدا، عێراقیش ساڵانێک بەو دەردەوە گرفتار بووە و بووەتە بەڵایەک کە ڕێگەی لە پێشکەوتنی گرتووە لە سەرجەم سێکتەرەکان. 

لێدوانی فەرمی: ئەمیر مەعموری، پەرلەمانتاری سەربەخۆ ڕایگەیاند، واژۆی زیاتر لە 100 پەرلەمانتار، کە سەرۆکی کوتلە سیاسییەکانیشیان تێدایە، کۆکراوەتەوە بۆ داواکردنی لەسەرکارلادانی بەڕێوەبەری کۆمپانیای گشتیی بازرگانیکردنی خۆراک و ناردنی بۆ لێکۆڵینەوە لەسەر دۆسیەکانی گەندەڵی و بەهەدەردانی ماڵی گشتی.

شێوازی جێبەجێکردن: بەگوتەی مەعموری، میکانیزمی بەهەدەردانەکە سادە و ڕوونە، نرخی هەر سەبەتەیەکی خۆراک لە 6 دۆلارەوە بە شێوەیەکی گوماناوی بۆ 9 دۆلار بەرزکراوەتەوە. ئەم جیاوازییە سێ دۆلارییە، کاتێک بۆ 40 ملیۆن هاووڵاتی ئەژمار دەکرێت، مانگانە زیانی 120 ملیۆن دۆلار (نزیکەی 62 ملیار دینار) بە دوای خۆیدا دێنێت.

ئەوەی پێویستە بیزانیت: سێ ماددەی سەرەکیی ناو سەبەتەکە (زەیت، شەکر، دۆشاو) لە ناوخۆی عێراقدا بەرهەم دەهێنرێن، کە ئەمەش پرسیاری زیاتر لەسەر نرخە گرانەکە دروست دەکات.

ئەو مانایەی دەیگەیێنێت: مەعموری بۆ ئەوەی قەبارەی زیانەکە ڕوون بکاتەوە، جەختی کردەوە کە ئەو تریلیۆن دینارەی ساڵانە بەهەدەر دەچێت، بەشی ئەوە دەکات کە هەزار قوتابخانە، هەزار بنکەی تەندروستی، یان 250 نەخۆشخانەی پێ دروست بکرێت؛ ئەو خزمەتگوزارییانەی کە وڵات پێویستییەکی زۆری پێیانە.