هۆشدارییەکی خێرا لە حکومەتی کوردستان بۆ فەرمانبەران و هاووڵاتیان

ئاڤا نیوز

فەرمانگەی تەکنەلۆژیای زانیاریی حكومەتی هەرێمی كوردستان ڕایدەگەیێنێت، چه‌ند ڕۆژێكه‌ هەڵمەتێكی هێرشی ئەلیكترۆنی بۆ سەر فەرمانبەران و هاووڵاتیانی هەرێمی كوردستان لەلایەن کۆمەڵێک ڕێکخراو دەستیپێكردووە، هاككەران لەژێر ناوی فەرمیی حكومی و دەزگای متمانەپێكراو بەشێوەی هەڕەمەكی ئیمێڵ بۆ هاووڵاتیان دەنێرن.

ڕاگەیێنراوی فەرمی: فەرمانگەی تەكنەلۆژیای زانیاری سەر بە ئەنجوومەنی وەزیرانی هەرێمی كوردستان، ئەمڕۆ چوارشەممە 23ـی تەمموز، لە ڕاگەیێنراوێكدا بڵاویكردووەتەوە، لە ڕۆژانی ڕابردوودا، ژمارەیەك ڕێكخراو هەڵمەتێكی هێرشی ئەلیكترۆنییان بۆ سەر فەرمانبەرانی حكومی و بەشێك لە هاووڵاتیان دەستپێكردووە و لەڕێگەی بەکارهێنانی ئیمەیڵی حکومی و دامەزراوەی متمانەپێکراو، فایل و لینكی زیانبەخش و ڤایرۆساوی بەمەبەستی هاككردنی ئامێرە ئەلیكترۆنییەكان و دەستگەیشتن بە داتای نێو ئامێرەكان بۆ هاووڵاتیان و فەرمانبەران دەنێرن.

خاڵە نەرێنییەكان: لەڕێگەی ئیمەیڵەوە به‌سته‌ر و لینکی گوماناوی ڕەوانە دەكرێت، مەبەست لێی هاككردنی ئامێری كارمه‌ندان و فه‌رمانبه‌رانی حكومییە بۆ دەستگەیشتن بە داتاكانی نێو مۆبایل و ئامێرە ئەلیكترۆنییەكانی دیكە.

ئەوەی پێویستە بیزانیت: فەرمانگەی تەکنەلۆژیای زانیاری داوا له‌ فه‌رمانبه‌ران و كارمه‌ندانی حكومی و هاووڵاتیان دەكات، هەرگیز ئەو لینك و بەستەرە گوماناوییانە نەكەنەوە و كلیكی لەسەر نەكەن تەنانەت ئەگەر لە سەرچاوەی باوەڕپێكراویشەوە ڕەوانە كرابوو، تەنها ئەگەر لەلایەن كەسێكی ناسراو و جێی متمانە ڕەوانە كرابوو.