لە هەولێر زەوی بەسەر زیاتر لە دوو هەزار فەرمانبەری دیكە دابەش دەكرێت

ئاڤا نیوز

پرۆسەی دابەشكردنی زەوی لە هەرێمی كوردستان بەردەوامە و ئەمڕۆ لە سنووری شارەوانیی قوشتەپە زیاتر لە دوو هەزار فەرمانبەر زەوییان پێدەدرێت.

چیرۆکی سەرەکی: بە بڕیاری ئەنجوومەنی وەزیرانی کوردستان، پرۆسەی دابەشکردنی زەوی بەسەر فەرمانبەران و خانەنشینان بەردەوامە، ئەمڕۆ لە سنووری قوشتەپە لە هەولێر زیاتر لە دوو هەزار زەوی دابەش دەکرێت.

لێدوانی فەرمی: عەبدولقادر مزەفەر، سەرۆكی شارەوانیی قوشتەپە بە ئاڤا میدیای ڕاگەیاند: دوای بڕیاری سەرۆكوەزیران مەسرور بارزانی سەبارەت بە دابەشكردنی زەوی بەسەر فەرمانبەران، دەستمان بە ئامادەكارییەكان كرد بۆ تەرخانكردنی زەویی پێویست لە سنووری قوشتەپە، ئێستا زەوییەكان بۆ دابەشكردنیان بەسەر فەرمانبەرانی سنووری قوشتەپە ئامادەیە.

"نزیكەی دوو هەزار و 25 فەرمانبەر فۆڕمی وەرگرتنی زەوییان پڕ كردووەتەوە و پێشكەشیان كردووە و ئێمەش زەویمان بۆ تەواوی ئەو فەرمانبەرانە تەرخان كردووە و وا بڕیارە كاتژمێر (2:00)ـی پاشنیوەڕۆی ئەمڕۆ تیروپشكی دابەشكردنی زەوییەكان ئەنجام بدرێت".

زانیاریی زیاتر: ئەو كەسانەی ئەمڕۆ زەوییان لە سنووری قوشتەپە پێدەدرێت، پێكهاتوون لە فەرمانبەرانی شارستانی و ئاسایش و هێزەكانی ناوخۆ و پێشمەرگە.