%75ـی دانیشتووانی هەرێمی كوردستان لە پسوولەی ئەلیكترۆنیی خۆراك تۆمار كراون

ئاڤا نیوز

تۆماركردنی خێزانەكان لە ئەپڵیكەیشنی پسوولەی ئەلیكترۆنیی خۆراك بەردەوامە و دوا وادەش بۆ بەردەستبوونی سیستمەكە سەرەتای مانگی داهاتووە، بەپێی ئاماری وەزارەتی بازرگانیی هەرێمی كوردستانیش تاوەكوو ئێستا 75%ـی دانیشتووانی هەرێمی كوردستان لە پسوولەی ئەلیكترۆنیی خۆراك تۆمار كراون.

وێنە گەورەکە: چەند مانگێکە پرۆسەی بە ئەلیكترۆنیكردنی پسوولەی خۆراك دەستی پێكردووە و سەرەتاش لە پارێزگای واست 100% كارەكانی تەواو بوون و سەركەوتوو بوو، ئێستا كۆمپانیای جێبەجێكار ئەزموونەكە لە شەش پارێزگای دیكەی عێراق جێبەجێ دەكات.

لێدوانی فەرمی: سەروەر هاواری، بریكاری وەزارەتی بازرگانی و پیشەسازیی هەرێمی كوردستان بە ئاڤا میدیای ڕاگەیاند: بەدیجیتاڵیكردنی پسوولەی خۆراكی هاووڵاتیان پڕۆژەیەكی زۆر مۆدێرن و پێشكەوتووە، كە وەزارەتی بارزگانیی عێراق سەرپەرشتیی دەكات و وەزارەتی بازرگانیی هەرێمی كوردستانیش هەماهەنگە بۆ ئەوەی لە تەواوی عێراق و هەرێمی كوردستان جێبەجێ بكرێت.

سەروەر هاواری ئەمانەشی وت:

٠ پرۆسەكە لە 2025-06-05، لە پارێزگای هەڵەبجە دەستیپێكرد و ئێستا 84%ـی دانیشتووانی ئەو پارێزگاكە پرۆسەكە بەشدار بوونە، لە پارێزگای هەولێر %78، لە پارێزگای سلێمانی %75، لە پارێزگای دهۆك %68ـی دانیشتووان بەشدار بوونە، بە كۆی گشتی پارێزگاكان 75%ـی دانیشتووانی هەرێمی كوردستان لە پرۆسەكە بەشدار بوونە و پسوولەكانیان كردووەتە ئەلیكترۆنی.

٠ سەرەتا تەنیا مانگێك بۆ پرۆسەكە دیاركرابوو 2025-07-05، دوا وادە بوو ،بەڵام ڕێژەكە زۆر بەرز نەبوو بۆیە ماوەكە درێژكرایەوە و ئێستا دوایین وادە بۆ تۆماركردنی خێزانەكان لە پسوولەی خۆراكی ئەلیكترۆنی 2025-08-01، پێویستە سەرجەم هاووڵاتیان تاوەكوو ئەو وادەیە سەرجەم زانیارییە پێویستەكان لەو ئەپڵیشكەیشنە تۆمار بكەن.

٠ ئەپڵیكەیشتنەكە لە دەرەوەی عێراق كار ناكات و هیچ كەسێك ناتوانێت خۆی تۆمار بكات چونكە پەیوەست كراوە بە جی پی ئێسەوە.

٠ هەر كەسێك پسوولەكەی نەكات بە ئەلیكترۆنی لە بەشە خۆراكی مانگانە بێبەش دەبێت.