وەزارەتی پێشمەرگە: لە پڕۆسەی دابەشکردنی زەوی کەسانی شایستە مافیان نافەوتێت

ئاڤا نیوز

سەرۆکایەتیی ئەرکانی وەزارەتی پێشمەرگە ڕایگەیاندووە لەگەڵ وەزارەتی شارەوانی کۆبوونەتەوە، داوا دەکرێت ئەو شەش ڕوونکردنەوەیەی لەبارەی دابەشکردنی زەوی خراونەتە ڕوو، هەموو ئەفسەر و پلەدار و پێشمەرگەیەکی وەزارەت پێوەی پابەند بێت.

 

وێنە گەورەکە: ڕۆژی 27-3-2024 مەسرور بارزانی، سەرۆکوەزیرانی کوردستان لە کۆبوونەوەی هەفتانەی ئەنجومەنی وەزیران کۆمەڵێک بڕیاری ڕاگەیاند، یەکێک لە بڕیارەکان دابەشکردنی زەوی بوو بەسەر فەرمانبەران.

ڕاگەیێنراوی فەرمی: ئەمڕۆ 24ـی تەمموز وەزارەتی پێشمەرگە لەگەڵ وەزارەتی شارەوانی کۆبوونەتەوە. شەش خاڵ خراونەتەڕوو سەبارەت بە تەرخانکردنی زەوی نیشتەجێبوون بۆ ئەفسەر، پلەدار و پێشمەرگەکانی وەزارەت و فەرماندەیی هێزەکانی (70 و 80)، کە بەهۆی خزمەتەوە شایستەی وەرگرتنی زەوین. 

ڕوونکردنەوەکەی سەرۆکایەتیی ئەرکانی وەزارەتی پێشمەرگە ئەم خاڵەی تێدایە:

- لەگەڵ وەزارەتی شارەوانی جەختکراوەتەوە کە زۆرترین پێشمەرگە سوودمەندی وەرگرتنی زەوی بن، بەپێی ناوچەی جوگرافی.

- لەو لیستانەی بڵاوکراونەتەوە و ڕەزامەندی ئەنجوومەنی وەزیرانی بۆ وەرگیراوە، مەرج نییە هەر ئەفسەر و پلەدار و پێشمەرگەیەک کە ڕەزامەندى هەبێت زەوى پێبدرێت، چونکە لە پرۆسەی فلتەرکردن هەر ناوێک پێشتر سوودمەند بووبێت ناوی دەردەهێنرێت.

- ئەو ئەفسەر و پلەدار و پێشمەرگانە لەکاتی پڕکردنەوەی فۆڕمی وەرگرتنی زەوی لە فەرمانگەی یاسایی بەڵێننامەیان پڕکردوەتەوە کە پێشتر سوودمەند نەبوون. بەڵام ئەگەر بەڵێننامەیان دابێ و پێشتر سوودمەند بووبن، لێپێچینەوەى یاسایى و کارگێرى و داراییان لەگەڵ دەکرێت. لە ڕۆژانی داهاتوو ناوی سوودمەندبوان لە وەزارەتی شارەوانی دەگەڕێتەوە، دەرفەتە بۆ ئەوانەی پێشتر سوودمەند بوون و بەڵێننامەیان پڕکردوەتەوە، سەردانی فەرمانگەکانیان بکەن بۆ سڕینەوەی ناوەکانیان، ئەگەرنا لێپرسینەوەیان لەگەڵ دەکرێت.

- ڕێکارە کارگێڕییەکان بۆ تەرخانکردنی زەوی لە وەزارەتی شارەوانی کاتی پێویستە، بۆیە داوا لە ئەفسەر و پلەدار و پێشمەرگەکان دەکرێت سەردانی بەشی پەیوەندیدار لە وەزارەتەکانی پێشمەرگە و شارەوانی نەکەن تا ئەو کاتەی لیستی کۆتایی ڕادەگەیێنرێت.

- هەر ئەفسەر و پلەدار و پێشمەرگەیەک ئەگەر مەرجەکانی وەرگرتنی زەوی هەبێت مافی نافەوتێت.

- بەرپرسی ئیدارەی یەکەکان بۆ ڕێکخستنی داتا و زانیاری ڕێکاری پێویست ئەنجام دەدەن.