مووچەی مانگەکانی شەش و حەوت و دواتر چۆن و کەی دەنێردرێت؟

ئاڤا نیوز

لەگەڵ ڕاگەیاندنی لیستی دابەشكردنی مووچە، وەزارەتی دارایی و ئابووری ڕاستەوخۆ دەستی بە دابەشکردنی مووچە کرد، وەزارەتەکە لە ماوەی سێ ڕۆژدا و هەژماری منیش لەماوەی دوو ڕۆژدا کۆتایی بە دابەشکردنی مووچەی مانگی پێنج دەهێنن. ئاڤا زانیاریی نوێ لەبارەی مووچەی مانگەکانی شەش و حەوت ئاشكرا دەکات. 

وێنە گەورەکە: لەدوای سێ مانگ لە ڕاگرتنی مووچەی فەرمانبەرانی هەرێمی کوردستان لەلایەن وەزارەتی دارایی عێراقەوە، دوای ڕێککەوتنی نێوان هەولێر و بەغدا، ڕۆژی سێشەممە سەرۆکوەزیرانی عێراق بڕیاری لە ناردنی مووچەی مانگی پێنجی فەرمانبەرانی کوردستان دا. 

زانیاریی زیاتر: ئەو مووچەی ئێستا فەرمانبەران وەریدەگرن، مووچەی مانگی پێنجە و مووچە مانگەکانی شەش و حەوت دەمێنێتەوە و ئاڤا لەوبارەیەوە بەدواداچوونی بۆ کاتی دابەشکردنی ئەو دوو مووچەیەش کردووە. 

لێدوانی فەرمی: بەرپرسێکی باڵای حکومەتی عێراق لەوبارەیەوە بە ئاڤای ڕاگەیاند: گرنگ مووچەی مانگی پێنج بوو، ئێستا ئەو بەربەستە شکێنراوە، مووچەی مانگەکانی داهاتووش بەهەمان میکانیزم و شێواز بەردەوام دەبێت.

مەبەست لە ڕێککەوتنی هەولێر و بەغدا، ناردنی داهاتی نانەوتی و نەوت بوو بۆ بەغدا، دوای ئەوە حکومەتی فیدراڵی بەردەوام دەبێت لە ناردنی مووچە. 

ئەو سەرچاوەی ئاڤا باسی لەوەشكرد: کات نابێتە کێشە بۆ ناردنی مووچەی مانگی شەش، بەغدا دوو مووچە قەرزدارە و هەرچەند زوو داهاتی نانەوتی و نەوت بۆ بەغدا بنێردرێت، مووچەی مانگی شەشیش دەنێردرێت. 

ئەوەی پێویستە بیزانیت: بۆ ئەوەی فیدراڵی بەردەوام بێت لە ناردنی مووچە، پێویستە حکومەتی هەرێمی کوردستان چەند خاڵێک پەیڕەو بکات؛-

یەکەم؛ لیستی مووچەی مانگی شەش، نێردراوە و کێشەی نییە.

دووەم: میزان مراجەعە، ڕاپۆرتی خەرجی و داهاتەکانی حکومەت، لە سەرەتای ئەم هەفتەیە بۆ بەغدا نێردراوە.

سێیەم: دەبێت حکومەتی کوردستان 120 ملیار دیناری دیکە لە داهاتی ناوخۆ بداتە بەغدا.

چوارەم: دەبێت پرۆسەی هەناردەکردنی نەوت دەستپێبکاتەوە، یان لەڕێگەی بۆری بنێردرێت بۆ بەندەری جەیهان، یان هەر لە ناوخۆی عێراق بدرێتە سۆمۆ.

ئەمەش بزانە: ئێستا لیژنەیەکی هاوبەش لە نێوان هەولێر و بەغدا، کار لەسەر ئەوە دەکەن بەزووترین کات پرۆسەی دووبارە هەناردەکردنەوەی نەوت دەستپێبکاتەوە، هاوکات بەرهەمهێنانی نەوتیش بۆ 280 هەزار بەرمیل لە ڕۆژێکدا بەرزبکرێتەوە.