لە پارکێکی قەڵادزێ تەرمی گەنجێک دۆزرایەوە

ئاڤا نیوز

دوای نیوەڕۆی ئەمڕۆ هەینی، لە پارکی شنەی قەڵادزێ تەرمی گەنجێک دۆزرایەوە، ئاسەواری چەند فیشەکێک لەسەر جەستەی هەبووە.

لێدوانی فەرمی: د. ئازاد ئەحمەد، بەڕێوەبەری نەخۆشخانەی قەڵادزێ بە ئاڤا میدیای ڕاگەیاند، دوای نیوەڕۆی ئەمڕۆ هەینی لە پارکی شنە تەرمی گەنجێک دۆزرایەوە، سەرەتا ناسنامەکەی نەزانرا دواتر دەرکەوت ناوی (ز، ئـ، ع)ـە لە دایکبووی ساڵی 2004ـە واتا 21 ساڵە و دانیشتووی گەڕەکی ئاشتییە.

زانیاری زیاتر: بەوتەی بەڕێوەبەری نەخۆشخانەی قەڵادزی، کە تەرمەکە هێنراوە بۆ نەخۆشخانە شوێنەواری چەند فیشەکێک بەسەر جەستەیەوە هەبووە. هێشتا نازانرێت ڕووداوەکە خۆکوژی بووە یان کوشتنە. بۆیە تەرمەکەی بەڕێکراوە بۆ پزیشكی دادی سلێمانی بۆ زانینی هۆکارەکەی.

ئەوەی پێویستە بیزانیت: تا ئامادەکردنی ئەم هەواڵە، ئەمڕۆ هەینی ئەمە دووەم  دۆزینەوەی تەرمە، بەیانی ئەمڕۆش لە گوندی تەپەڕەشەی قەزای سەیدسادق، تەرمی پیاوێک لەناو حەفارەیەک دۆزرایەوە شوێنەواری لێدان و خاکەناس بە جەستەیەوە دیاربووە.