سەفین دزەیی: لەگەڵ کاربەدەستانی ئەمریکا هێرشە درۆنییەکان و پەیوەندی نێوان هەولێر و بەغدامان تاوتوێ کرد

ئاڤا نیوز

فەرمانگەی پەیوەندییەکانی دەرەوەی حکومەتی هەرێمی کوردستان، لەگەڵ وەزارەتە جیاوازەکانی ئەمریکا و کۆنگرێس، دەربارەی کۆتا پێشهاتەکان کە لەناوچەکە ڕوویانداوە گفتوگۆ و هەڵسەنگاندنیان کرد.

وێنە گەورەکە: لەماوەی یەک مانگی ئەمساڵ، 19 هێرشی درۆنی کرایە سەر ناوچە جیاجیاکانی هەرێمی کوردستان بەتایبەتی کێڵگە نەوتیەکان، کە کاریگەری لەسەر بەرهەمهێنانی نەوت دروست کرد، هاوکات حکومەتی عێراق سێ مانگە بە بیانووی جیاواز مووچەی فەرمانبەرانی هەرێمی کوردستانی نەناردووە.

لێدوانی فەرمی: سەفین دزەیی، بەرپرسی فەرمانگەی پەیوەندییەکانی دەرەوەی حکومەتی هەرێمی کوردستان ڕایگەیاند، لەگەڵ کاربەدەستانی ئەمەریکا بەدواداچوونمان بۆ ڕێککەوتنی دوو مانگ پێش ئێستا کرد لەبواری وزە، هاوکات لەگەڵ وەزارەتە جیاوازەکان و کۆنگرێس، دەربارەی کۆتا پێشهاتەکان کە لەناوچەکە ڕوویانداوە گفتوگۆ و هەڵسەنگاندنمان بۆ کرد.

"پەیوەندییەکانی هەولێر و بەغدا و پرسی بودجە و مووچە و هێرشە درۆنییەکان بۆ سەر کێڵگە نەوتییەکان لە هەرێمی کوردستان تەوەرێکی دیکەی کۆبوونەوە و دیدارەکان بوون".

لەلایەکی دیکەوە: لەکاتی بەشداریکردنی لە پانێڵکدا لە واشنتن، بەرپرسی فەرمانگەی پەیوەندییەکانی دەرەوەی حکومەتی هەرێمی کوردستان باسی لەوەکرد، هێرشە درۆنییەکان کاریگەرییان لەسەر بەرهەمهێنانی نەوت هەبوو و داوامان لە بەغدا کردووە لیژنەیەک پێکبهێندرێت، بۆ ئەوەی کۆتایی بەو هێرشانە بێت، چونکە بەهۆیانەوە چوار کێڵگەی نەوتی زیانیان بەرکەوتووە.