24 گەنجە دەستگیرکراوەکەی لیبیا دەگەڕێنرێنەوە کوردستان

ئاڤا نیوز

دوای هەوڵێکی زۆر بۆ ئازادکردنی ئەو گەنجانەی لە لیبیا دەستگیرکرابوون، بڕیارە لە ئایندەیەکی نزیکدا لەڕێگای فڕۆکەخانەی شاری بەنغازی لیبیا هەموویان بگەڕێنرێنەوە هەرێمی کوردستان.

وێنە گەورەکە: ماوەیەکە بەشێک لەوانەی دەیانەوێت بگەن بە ئەوروپا ڕێگای لیبیا بەکاردەهێنن. لە ڕابردوودا ژمارەیەکی زۆری خەڵک لەو ڕێگایە یان ڕفێنراون یان دەستگیرکراون.

لێدوانی فەرمی: د. موسەنا ئەمین، ئەندامی لیژنەی پەیوەندییەکانی پەرلەمانی عێراق بە ئاڤا میدیای ڕاگەیاند، کەسێکمان ناردووەتە فرۆکەخانەی بەنغازی تا ئاگاداری ئەو گەنجانە بێت، هەروەها لەگەڵ ئاسایشی فرۆکەخانە قسە کراوە، هەر 24 گەنجەکە دەنێردرێن بۆ هۆتێلێک تا دەتوانرێت بلیتی گەڕانەوەیان بۆ دابین بکرێت و بێنەوە هەرێمی کوردستان.

لەلایەکی دیکەوە: یەکێک لەو گەنجانەی لە فڕۆکەخانەی بەنغازییە قسەی بۆ ئاڤا کردووە دەڵێت: چاوەڕوانی ئەو کەسەین کە بڕیارە بێت بۆ لامان تا ئێستا نەهاتووە. وابڕیارە بنێردرێین بۆ هۆتێلێک تا تکیتمان بۆ دابین دەکرێت.

ئەوەی پێویستە بیزانیت: ئەو کاتەی کەسوکاری ئەو گەنجانە ئاڤایان ئاگادارکردەوە لە دەستگیرکردنیان، ئاڤا میدیا د. ئەحمەد سەحاف، هەڵسوڕێنەری باڵیۆزخانەی عێراق لە لیبیا و د. موسەننا ئەمین، ئەندامی لیژنەی پەیوەندییەکانی دەرەوە لە پەرلەمانی عێراقی ئاگادار کردەوە و دوای هەوڵێکی زۆر ئازادکران.