هەنگاوێکی نوێ لەبارەی پرۆسەی ئاشتی؛ ژمارەی ئەندامانی کۆمیسیۆنی پەرلەمانی تورکیا دیاری کرا

ئاڤا نیوز

 

کۆمیسیۆنی "کۆمەڵگەی ئاشتی و دیموکراتیک" لە پەرلەمانی تورکیا بە 51 ئەندامەوە پێکهێنرا و ژمارەی کورسییەکان بەپێی قەبارەی فراکسیۆنەکان بەسەر پارتە سیاسییەکاندا دابەش کراوە. دوایی ئەوەی پارتەکان ناوی نوێنەرانیان پێشکەش بە سەرۆکایەتیی پەرلەمان دەکەن، کۆمیسیۆنەکە دەست بە کارەکانی دەکات.

چیرۆکی سەرەکی: لە چوارچێوەی هەوڵەکان بۆ بەرەوپێشبردنی پرۆسەی ئاشتی، کارەکانی پێکهێنانی کۆمیسیۆنێکی پەرلەمانی لە تورکیا گەیشتە قۆناغی کۆتایی. سەرۆکایەتیی پەرلەمانی تورکیا، بە واژۆی نوعمان کورتوڵموش، سەرۆکی پەرلەمان، داوای لە فراکسیۆنەکان کردووە ناوی ئەندامانیان بۆ بەشداریکردن لە کۆمیسیۆنەکەدا بنێرن. مۆڵەت بۆ ناردنی ناوەکان تا کاتژمێر 5ی ئێوارەی ڕۆژی 31ی تەممووز دیاری کراوە.

بڵاوکراوەی فەرمی: بەپێی نووسراوێکی فەرمیی سەرۆکایەتیی پەرلەمانی تورکیا، کورسییەکانی کۆمیسیۆنەکە بەم شێوەیە دابەش کراون: ئاکپارتی 21 ئەندام، جەهەپە 10 ئەندام، مەهەپە و دەم پارتی هەر یەکەیان 4 ئەندام، ئیی پارتی و ڕێگای نوێ (یەنی یۆڵ) هەر یەکەیان 3 ئەندام. هەروەها، هوداپار، ڕەفاهی نوێ، پارتی کرێکارانی تورکیا (تیپ)، پارتی کاری میللەت (ئەمەک)، پارتی چەپی دیموکرات (دەسەپە) و پارتی دیموکرات (دەپە) هەر یەکەیان بە یەک ئەندام بەشدار دەبن.

 

ئەوەی پێویستە بیزانیت: ژمارەی ئەندامانی کۆمیسیۆنەکە مشتومڕێکی زۆری لێکەوتەوە. لە سەرەتادا، دەوڵەت باخچەلی، سەرۆکی مەهەپە، پێشنیازی کردبوو کە لیژنەکە لە 100 ئەندام پێکدێت. دواتر دەم پارتی داوای کەمکردنەوەی ژمارەکەی کرد بۆ 50-60 ئەندام.  لە قۆناغێکدا بڕیار لەسەر 45 ئەندام درابوو، بەڵام دواجار ژمارەکە بۆ 51 ئەندام بەرزکرایەوە.

باکگراوند: دوای ئەوەی لە 11ی تەممووزدا، گرووپێک لە ئەندامانی پەکەکە لە مەراسیمێکدا لە ئەشکەوتی جاسەنە چەکەکانیان سووتاند، پرۆسەی ئاشتی چووە قۆناغێکی نوێوە و ئێستا لە پەرلەمانی تورکیا تاوتوێ  دەکرێت، چاوەڕێ دەکرێت بڕیارەکانی ئەم کۆمیسیۆنە ڕێگەخۆشکەر بن بۆ گەڕانەوەی چەکدارانی پێشووی پەکەکە بۆ ناو ژیانی مەدەنی و سیاسی.