دوای مانگرتنیان بەهۆی بڕیارێکی ئێرانەوە کێشەی شۆفێرانی بارهەڵگر لە دەروازەی كێلێ بە كاتی چارەسەر دەكرێت

ئاڤا نیوز

بەهۆی مانگرتنی شۆفێرانی بارهەڵگر، هاتوچۆی بازرگانی و چوونی بارهەڵگرەكان بەرەو ئێران لە دەروازەی سنووریی كێلێ لە سنووری ئیدارەی ڕاپەرین دەوەستێت، دوای هەوڵی دوو لایەنەی بەرپرسانی ئیداریی سنوورەكە، گرفتەكەیان بەشێوەی كاتی چارەسەر دەكرێت.

 

چی ڕووی دا: سەرلەبەیانیی ئەمڕۆ شەممە 26ـی 7ـی 2025، شۆفێرانی بارهەڵگر بەهۆی بڕیارێکی ئێران بە دانانی قەپان، بڕیاری مانگرتن و ڕاگرتنی جموجۆڵی بازرگانییان دا لە دەروازەی سنووریی کێلێ لە سنووری ئیدارەی سەربەخۆی ڕاپەڕین.

 

لێدوانی فەرمی: شۆفێرێكی بارهەڵگر بە ئاڤا میدیای ڕاگەیاند، مانگرتنی شۆفێران لە دژی بڕیارێكی كۆماری ئیسلامیی ئێرانە بۆ دانانی قەپان لە دیوی ئێران، كە بە پێی بڕیارەكە؛ دەبێت بارهەڵگرەكان لە وێستگەیەكی كێش لە دیوی ئێران، بارەكانیان دووبارە قەپان بكەنەوە و بڕێك پارەش بدەن، بەو پێیەی حكومەتی ئێران كار بە كێشانی قەپانەكانی هەرێمی كوردستان و مەنەفێستی بارەكان ناكات.

 

زانیاریی بەدەستهاتوو: سەرچاوەیەك لە بەڕێوبەرایەتیی گومرگی ئیدارەی ڕاپەڕین تایبەت بە ئاڤا ڕایگەیاند، گرفتی بارهەڵگرەكان بە كاتی چارەسەر بووە و بەشێك لە شۆفێران بۆ هەڵگرتنی بارەكانیان جووڵەیان كردووە، هەردوو لایەنی هەرێمی كوردستان و كۆماری ئیسلامیی ئێرانیش لەسەر هێڵن بۆ چارەسەركردنی ئەو بابەتە.

 

ئەمەش بزانە: دەروازەی کێلێ یەكێكە لە دەروازە نافەرمییەكانی نێوان هەرێمی كوردستان و ئێران دەکەوێتە قەزای پشدەری هەرێمی کوردستان و شاری سەردەشتی ڕۆژهەڵاتی کوردستان.