وەزارەتى خوێندنى باڵای کوردستان: فەرامۆشکردنی زمانی کوردی پێچەوانەی بنەماکانی دەستور و پێکەوەژیانە

ئاڤا نیوز

وەزارەتی خوێندنی باڵا و توێژینەوەی زانستیی حکومەتی هەرێمی کوردستان ڕایگەیاند،  فەرامۆشکردنی زمانی کوردی پێچەوانەی بنەماکانی دەستور و پێکەوەژیانە. هاوکات لەگەڵ لایەنە پەیوەندیدارەکانی حکومەتی عێراق لەسەر هێڵ دەبین، بۆ چارەسەرکردنی ئەم پرسە و ڕێگەگرتن لە دووبارەبوونەوەی ئەم هەڵوێستە دوژمنکارانە.

ڕاگەیێنراوی فەرمی: ڕۆژی 26-7-2025، وەزارەتی خوێندنی باڵا و توێژینەوەی زانستی ڕاگەیاند: فەرامۆشکردنی زمانی کوردی لە دامەزراوەکانی خوێندنی باڵای عێراق پێچەوانەی بنەماکانی دەستوور و پێکەوەژیانە.

- ئیدانەی بڕیاری وەزارەتی خوێندنی باڵای حکومەتی عێراق دەکەی، کە ڕێگرتنە لە خوێندن و دانانی پرسیار بە زمانی کوردی لە زانکۆکانی موسڵ، کەرکووک، دیالە.

- بڕیارەکە پێشێلکردنی ڕاستەوخۆی ماددەی 4ی دەستووری هەمیشەیی عێراقە، هەروەها پێچەوانەی بەها و بنەماکانی پێکەوە ژیانە لە چوارچێوەی دەوڵەتی عێراقی فیدراڵ.

- داوا لە وەزارەتی خوێندنی باڵای عێراق دەکەین کە دەستبەجێ ئەو بڕیارە هەڵبوەشێنێتەوە، هەروەها کار بۆ ئەوە بکات کە زانکۆ و دامەزراوەکانی خوێندنی باڵا بە بێ جیاوازی ببنە ناوەندی پێکەوەژیان و ڕێزگرتن لە کلتوور و زمان و فەرهەنگی هەموو گەلانی عێراق.

- لەگەڵ لایەنە پەیوەندیدارەکانی حکومەتی عێراق لەسەر هێڵ دەبین، بۆ چارەسەرکردنی ئەم پرسە و ڕێگەگرتن لە دووبارەبوونەوەی ئەم جۆرە هەڵوێستە دوژمنکارانە.

ئەوەی پێویستە بیزانیت: ڕۆژی 15-7-2025، نووسراوێک لە وەزارەتی خوێندنی باڵای عێراق دەرچوو کە تێیدا ئاماژە بەوە کرابوو، وەرگێڕانی پرسیارەکان قەدەغەیە، هەروەها دەبێت وەڵامی پرسیارەکان لە زانکۆکانی کەرکووک، دیالە، موسڵ تەنیا بە زمانی عەرەبی بدرێتەوە.