ئاڤا وردەکاری لەبارەی وەرگرتنی پارە بۆ گەیاندنی بەڵگەنامەی لەدایکبوون دەخاتەڕوو

ئاڤا نیوز

وەرگرتنی بڕێک پارە لەلایەن کۆمپانیایەکەوە لە بەرامبەر گەیاندنی بەڵگەنامەی لەدایکبوون لە نەخۆشخانە حکومییەکان، ناڕەزایەتی لێ دەکەوێتەوە و ئاڤا لە بەدواداچوونێک، وردەکاری لەسەر پرۆسەکە دەخاتەڕوو، ئەندامێکی کۆمپانیاکە دەڵێت، بە فەرمی لەلایەن حکومەتەوە تۆمار کراوین و بەشێک لە داهاتی کارەکەمان بۆ حکومەت دەگەڕێتەوە.

چیرۆکی سەرەکی:  کۆمپانیای ئیگڵ پۆست، کە کاری گەیاندنە و بە فەرمی لەلایەن وەزارەتی گواستنەوە و گەیاندنەوە تۆمارکراوە، بەڵگەنامەی لەدایکبوون و مردووان لە نەخۆشخانە حکومییەکان دەگەیێنێتەوە بۆ خاوەنەکانیان و لەبەرامبەر گەیاندنەکە بڕێک پارە وەردەگرێت.

بەدواداچوونی ئاڤا: دامەزراندنی ئەم کۆمپانیایە لەژێر ڕۆشنایی بڕیارەکانی حکومەتە بۆ گەیاندنی بەڵگەنامەی فەرمی لە نێوان حکومەت و ھاونیشتمانیان کە بەپێی یاسای 148ـی ساڵی 1971 دامەزراوە.

بەپێی یاساکە وێنەی ڕەسەنی بەڵگەنامەکان لەڕێگەی پۆستەوە ھاتوچۆی پێ دەکرێت و قەدەغەیە بدرێتەوە دەست ھاونیشتمانی، ئەوەش بەمەبەستی پاراستنی زانیارییەکانە بۆ ئەوەی دەستکاری نەکرێن.

لێدوانی فەرمی: ئارام میران، ئەندامی دەستەی گارگیری کۆمپانیای ئیگڵ پۆست بە ئاڤای وت، کۆمپانیاکەیان تایبەت و حکومییە، بەهاوبەشی وەزارەتی گواستنەوە و گەیاندن ماوەی ساڵێک و مانگێکە دامەزراوە، لەسەر بەڵگەنامەکانی لەدایکبوون و مردووان کار دەکەن، 26%ـی داهاتەکەیشی بۆ حکومەتی هەرێمی کوردستان دەگەڕێتەوە.

زانیاریی زیاتر: لەبارەی شێوازی کارکردنیان، ئارام میران نموونەیەک دەهێنێتەوە و دەڵێت: "لە قۆناغی یەکەمی پڕۆسەکە لە وەرگرتنی بەڵگەنامە لە نەخۆشخانەکانەوە دەستپێدەکات، دەگەیێنرێتە ئۆفیسی لەدایکبوون و مردووانی سەر بە بەڕێوەبەرایەتی تەندروستی هەولێر، لەوێشەوە کاری تۆمارکردن و ئامادەکردنی بۆ دەکرێت، کۆپیەک لەوێ ئەرشیف دەکرێت، قۆناغی دووەمیش کۆپیەک بە مۆرەوە دەبردێتە ئۆفیسی کارتی نیشتمانی،  لە قۆناغی سێیەم و کۆتایشدا کۆپییەک دەدرێتە دەستی هاونیشتمانییەکە لەو ناونیشانەی کە خۆی پێشتر دیاری کردووە.

سەبارەت بە نرخەکانیش بەمجۆرە دانراون:  

پارێزگای هەولێر، 10 هەزار دینار وەردەگیرێت

لە دەرەوەی هەولێر تا حاجی ئۆمەران، 12 هەزار دینار وەردەگیرێت

لە پارێزگاکانی دهۆک و سلێمانی، 15 هەزار دینار وەردەگیرێت

دەرەوەی هەرێمی کوردستان، 18 هەزار دینار وەردەگیرێت

کۆمپانیاکە دەڵێت، ئەگەر لەم بڕانە پارەی زیاتر لە هاونیشتمانیان وەرگیرا، دەتوانن لەڕێگەی ئەم هێڵە گەرمانەوە سکاڵا تۆمار بکەن.  
5964000
5984000