لە کابینەی نۆیەمدا ڕێژەی سەوزایی لە هەرێمی کوردستان بەشێوەیەکی بەرچاو بەرز بووەتەوە

ئاڤا نیوز

بەپێی داتایەکی وردی ئەندازەی پارکەکانی هەولێر، لە کابینەی نۆیەمدا ڕێژەی سەوزایی لەسەر ئاستی کوردستان لە 15%ـەوە بەرز بووەتەوە بۆ زیاتر لە 20%، بەپێی پلانێکی حکومەتیش تا ساڵی 2030، 100 ملیۆن دار بەڕوو لە هەولێر دەچێنرێت.

وێنە گەورەکە: لە چوارچێوەی هەوڵەكانی كابینەی نۆیەم بۆ پاراستنی ژینگە، ڕێژەی سەوزایی لە هەرێمی کوردستان بەرزبوونەوەی بەرچاوی بەخۆیەوە بینیوە، بەجۆرێک لە ماوەی دە ساڵدا، ڕێژەی 10% بەرز بووەتەوە.

زانیاریی بەدەستهاتوو: بەپێی ڕاپۆرتێکی بەڕێوەبەری ڕاگەیاندنی ئەندازەی پارکەکانی هەولێر و سەرۆکی ڕێکخراوی ئایندە، کابینەی نۆیەمی حکومەتی هەرێمی کوردستان پلانێکی ستراتیژی داناوە، تا ساڵی 2030 بڕیارە لە شاری هەولێر 100 ملیۆن داربەڕوو بچێنرێت. ئێستا 300 هەزار دار بەڕوو چێنراوە و  پرۆسەکە بەردەوام دەبێت.

گۆڕانکارییەکان لەماوەی 10 ساڵدا:

لە شاری هەولێر ساڵی 2015 ڕێژەی سەوزایی 9.1% بووە، بەڵام ئەمساڵ ڕێژەی سەوزایی گەیشتووەتە 19.8%.

لە شاری سلێمانی ساڵی 2015 ڕێژەی سەوزایی 9.1% بووە، بەڵام ئەمساڵ ڕێژەی سەوزایی گەیشتووەتە 19.6%.

لە شاری هەولێر تا ساڵی 2019 تەنیا 60 هەزار دار چێنرابوون، بەڵام  لەماوەی تەنیا یەک ساڵدا واتا لە مانگی یەکی 2024 تاوەکو مانگی یەکی 2025، 131 هەزار و 270 دار چێنراون.

لە شاری هەولێر 644 باخچە و پارک و بلوار هەن.

لە شاری سلێمانی، 603 باخچە و پارک و بلوار هەن، بەپێی داتاکان ژمارەی دار و درەخت لەم شارە لە سێ ملیۆن دار نزیک بووەتەوە.

لە پارێزگای دهۆکیش ڕێژەی سەوزایی 12%ـیە و بە گشتی ڕووبەری سەوزایی لەم پارێزگایە 199 هەزار مەتر چوار گۆشەیە. 168 پارک و باخچەش هەن.

ئەوەی پێویستە بیزانیت: لە ڕاپۆرتەکە بەراوردێک کراوە، لەنێوان شارەکانی هەرێمی کوردستان و عێراق بۆ ڕێژەی سەوزایی، بەگوێرەی داتاکان ڕێژەی سەوزایی ئێستا لە شارەکانی عێراق لە 15%تێپەڕ ناکات و ساڵ دوای ساڵ کەمتر دەبێتەوە.